Muehleketeleriwa eka ku dlawa ka dokodela a nga tsutsumanga loko a ta khomiwa
Themba Chauke
Maphorisa ya xifundzhankulu xa Limpopo ya vule leswaku muehleketeleriwa wa dokodela leri a ri endla ntirho wo ntokotela vudokodela exibedlhele xa Mankweng u le ku landzeleleni ka swileriso swa maphorisa swo lavisisa nandzu wa ku dlawa ka dokodela. Wanuna wa malembe ya 25 eka ku dlawa ka Shongile Pretty Nkhwashu, loyi ntsumbu wakwe lowu a wu sungule ku onhaka wu kumekeke endzeni ka kamara rakwe ro khudzehela endzhaku ka risema leri a ri huma ekamareni leri.
Muvulavuleri wa maphorisa ya xifundzhankulu xa Limpopo Brigadier Motlafela Mojapelo u vule leswa muehleketeleriwa u khomiwile endlwini ya vantswari vakwe naswona a nga ringetanga ku tsutsuma hi nkarhi lowu a khomiwa. Mojapelo u vule leswaku va tshembha leswaku va khomile muehleketeleriwa loyi a lavekaka. Ku vuriwa leswaku a swi le rivaleni leswaku Nkhwashu u hetelerile ku voniwa rini exibedlhele. A swi le rivaleni leswaku a nga va a dlawile rini naswona a nga va a dlawile hi yini tani hi leswi ntsumbu wakwe a wu sungurile ku onhaka, naswona a nga ri na timbanga leti a ti vonakala.
Swiviko swi kombisa leswaku superintended wa xibedlhele u tivisiwile hi ta risema, naswona loko a fika u kumile kamara ri lotleriwile, leswi endleke leswaku maphorisa ya vitaniwa.
Maphorisa hi wona ya nga pfula rivanti ra kamara laha ku nga kumeka ntsumbu wa dokodela leri.
Emasunguleni maphorisa ya pfurile nandzu wa ku kumeka munhu a hundzile emisave, kambe endzhaku ka vulavisisi bya maphorisa, byi endlile leswaku muehleketeleriwa loyi ku nga muhlekisani wa dokodela a ya khomiwa.
