Vapfumari va nyikeriwa swakudya

Orlando Chauke

Ku tlula kwalomu ka dzana wa vaaki lava nga ringenelangiki ku kuma mpfuno eka mfumo va nykeleriwile hi swakudya leswi humaka eka xiyimbeleri xa vunanga bya vukhongeri na n’wamabindzu la tivekaka edorobeni ra Giyani Howard Mashaba.

Ku nyikeriwile kwalomu ka kutlula 112 wa maphasela ya swakudya eka ndhawu ya swakudya ya masipala wa Giyani, hi nkarhi lowu a ku simekiwa pfhumba leri kongomisiweke eka ku pfuna vanhu lava nga ringanelangiki ku kuma mpfuno ku suka eka mfumo. Ku komberiwa vanhu hinkwavo lava lavaka ku nyikela hi swakudya va tirhisa ndhawu leyi hikuva vanhu a va pfumeleriwi ku nyikela vanhu lava pfumalaka hi voxe handle ka ku tirhisa tindlela ta masipala.

Loko a vulavula hi nkarhi lowu a ku nyikeriwa swakudya, Sydwel Mabunda , mutumbuluxi wa Xitsonga Gospel Music Award Organisation, lowu niyeleke ku tlula dzana ra maphasela ya swakudya, u vule leswaku va vone swi fanerile leswi va swi endleke ku pfuna miganga ya vaaki. “Tani hi nhlangano lowu nga ri ki wo bindzurisa, hi tshembhela eka vaaki ku kuma mpfuno eka migingiriko ya hina, hikokwalaho hi vona swi fanerile ku nyikela laha na hina hi pfunekaka kona, ngopfu ngopfu eka lava nga kumiki mpfuno eka mfumo”.

Xirho xin’wana eka nhlangano lowu, Gezani Mabunda u vule leswaku migingiriko ya nhlangano yo nyikela masagwadi ya lembe na lembe yi ta ya emahlweni ehandle ka xinghunghumani xa Covid-19, laha a vuleke leswaku va ta tirhisa online ku fambisa ntirho lowu, laha a kombiseke leswaku endzhaku ka ntungu wa Corona, va ta nyikela masagwadi lawa kahle eka vahluri, laha a nga tlhela a kombela vaaki ku seketela ntirho wa vona.

Meyara wa masipala wa Giyani Basani Shibambu u amukerile swakudya leswi laha a vuleke leswaku loko vanhu hinkwavo va tinyiketerile ku seketela van’wani vanhu ku fana na leswi swi endliweke hi lava, vanhu hinkwavo emisaveni a va ta tlela va dyile. “Loko hi ka ri hi simeka pfhumba leri namuntlha, ndzi khensa ku tinyiketela ka n’wina eka pfhumba leri.”

“I vanhu vo fana na n’wina lava tisaka ku tshembha eka vaaki, hambi ku nga ri na nchumu, loko a hi ri na vanhu lava tinyikelaka ku fana na n’wina, a hi nga ta dlawa hi ndlala emisaveni, ku vula meyara hi ku khensa nhlangano lowu.