Maphorisa na masocha ya nghenela miganga

Orlando Chauke

Vanhu vo hlaya va khomiwile endzhaku ka loko maphorisa na masocha ya nghenerile miganga ya le Giyani ku hlotana na lava va tlulaka swipimelo swa mfumo swo tshama emakaya, va famba va nwa byalwa bya xintu hambi leswi byi nga yirisiwa.

Pfhumba leri a ri rhangeriwile hi maphorisa ya tiko, maphorisa ya le magondzweni, masocha, masipala wa Giyani, xiyenge xa vuhlanganisi xa mfumo (GCIS) xikan’we na xiyenge xa rihanyo ku langutisisa eka vuhlayiseki bya swakudya eka tindhawu ta mabindzo lamantsongo.

Lava sunguleke ku khomiwa hi lava a va ri ku akeni ka tindlu ku suka ehansi kumbe ku engetela swin’wana eka tindlu ta vona, lava a va vona ingaku va landzelela nawu tani hi leswi a va tihrha emakaya.

Un’wana wa vaaki loyi a kumiweke a ka ri a aka yindlu yakwe emugangeni wa ka Makosha, u vule leswaku mfumo wu byerile vanhu leswaku va tshama emakaya, naswona loko vanhu va ri emakaya va endla migingiriko ya le kaya, hikokwalaho a tekile xiboho xo aka yindlu yakwe.

Wanuna loyi u kumiwile a ri na van’wana vanhu vambirhi lava a tirha na vona, kambe a vula leswaku u le ku landzeleleni ka nawu, endzhaku ka nkarhi u byeriwile leswaku a ntshuxa vanhu lava va ya tshama na mindyangu ya vona, na yena tshikiwa na ndyangu wakwe endhzaku ka ku amukela nadzu.

Nandzu lowu fanaka wu humelerile eka Homu 14C laha un’wana wanuna a kumiweke na vavanuna va mune a ri ku akeni ka yindlu laha a vuleke leswaku vavanuna lava i maxaka yakwe.

Kambe lava kumiweke na xihoko a va tshikiwanga va khomiwile xikan’we-kan’we va tlhela va haleteriwa byalwa bya vona. Kambe lava poneke hi lava lumiweke ndleve hi pfhumba leri maphorisa ya nga se fika. Maria Chauke loyi a hlutaka byala bya xintu u vule leswaku u tshikile ku hluta byalwa lebyi endzhaku ko kumiwa nkarhi lowu hundzeke.

Muvulavuleri wa masipala Steven Mabunda u vule leswa pfhumba leri ri kongomisiwile eka ku lemukisa vaaki ku landzelela swipimelo swa mfumo.