Ku yirisiwa ka xihoko swo dlayisa ndyangu hi ndlala

Orlando Chauke

Ku fana na van’wana lava tlulaka nawu wa swipimelo swa mfumo, lava tekeriwaka tinhundzu ta vona hi maphorisa, ndyangu wa ka Mthukwe wu twa kuvava endzhaku ka ku lahlekeriwa hi tinhundzu ta wona.

Ndyangu lowu wu lahlekeriwile swinene, endzhaku ka loko maphorisa na masocha ya nghenile emuntini lowu ya halata byala bya xintu bya nxavo wa R5 000 na bya xilungu bya kwalomu ka R1 900, laha a nga bazela hi ku ya pfaleriwa ehokweni ya tinsulavoya xikan’we na ndziho wa R3 000 leswi cheleke munyu ehenhla ka xilondza eka timali takwe.

Mthukwe u na vavasati vanharhu, vana va khumentzevu, na vantukulu va mune lava a tshamaka na vona, u vule leswaku ku khomiwa kakwe swi n’wi dyele mali yo tala, naswona wa ha ri ku ringeteni ku vuyisa mali leyi. “Ndyangu wa mina wu nkulu swinene, ndzi boheka ku tshamela ro lava mali ku kota ku ondla vanhu lava, lexi vavaka eka mina hi leswaku andzi lahlekeriwanga ntsena hi tinhundzu, kambe ndzi lahlekeriwile na hi mali ya mina leyi a ndzi yi hlayisile leswaku yi ta hi pfuna hi nkarhi lowu wa xinghunghumani lexi xa Corona.”wa hlamusela.

Loko a vutisiwa leswaku vutomi u byi koka njhani endzhaku ka ku tekeriwa tinhundzu takwe, Mthukwe u vule leswaku va hanya hi mpfuno wa mali ya vana eka mfumo. “Loko hi dya masiku lawa a hi dyeli ku xurha, hi dyela ku khomisa nyoka ntsena.”

Ndyangu lowu wu xava malofo ya ntsevu ya swakudya swa namixo, na phakiti rin’we ra matlharhi ya tiya, laha a vuleke leswaku enkarhini wa sweswi a swi fikeleleki hikuva a ku na mali yi nghenaka. Loko ku ri xisakana xa nyama ya huku xa 5kg, xi swekiwa kan’we na swona

Loko a vutisiwa leswaku hikokwalaho ka yini a tekile xiboho xo teka vavasati vo tala, ehandle ka nsati wun’we, u hlamule a ku “leswi swi endla leswaku ndzi tshama ekaya ndzi nga vi na vutlhoma mahlo hala handle.”