Primiya wa Limpopo a pfula xibedhlele eModimolle

Spread the love

Primiya wa Xifundzankulu xa Limpopo, Nkulukumba Chupu Mathabatha, u pfurile ximfumo xibedhlele eModimolle lexi endliweke ku ta lwisana na ntungu wa xitsongwatsongwana xa Khorona. Xibedhlele lexi xi ta tlhela xi tirhisiwa ku rhurhela vanhu lava nga tluleriwa hi xitsongwatsongwana xa COVID-19, tlhelo no amukela vanhu lava va faneleke ku tihambanyisa na rixaka ku fikela laha va holaka eka xinghunghumana lexi.

Xibedhlele xi pfuriwile ehansi ka vurhangeri bya MEC wa rihanyo wa Xifunzankulu Dkd Phophi Ramathuba. Hambiswiritano, primiya Mathabatha u byele vaaki va leswaku “ku pfuriwa ka xibedhlele lexi swi komba ndzima leyi nga tirhiweke ku ta lwisana na vuvabyi bya Khorona”. “Tanihi Xifundzankulu hi tekile xiboho xo kuma switirhisiwa leswi hi swilavaka, naswona switirhisiwa hikwaswo leswi hi nga na swona hi fanele ku switirhisa hi ndlela ya vuron’wana,” ku vula Mathabatha.

Xibedhlele lexi xi na mibedo ya ICU ya kwalomo ka 54, xi tlhela xi va na 89 wa mibedo leyi nga lulamela vanhu lava tluleriweke hi vuvabyi bya Khorona, kasi 27 wa midedo eka leyi ya 89 yi ta tirhisiwa eka vanhu lava va nga eka muchini wo pfuneta ku hefemula.

Mathabatha u tlhele a vula leswaku Xifundzankulu xi tiyimiserile ku ta na switshunxo swa rihanyo swa nkarhi hikwawo. Naswona leswi nga ta endla leswaku vaaki va Xifundzankulu va oloveriwa hi vutomi hi tlhelo ra swa rihanyo ra vona. Xifundzankulu xi bakanyela etlhelo ku akiwa ka swibedhlele swa nkarhinyana, hikwaloho Ndzawulo ya Rihanyo yi endlile xibedhlele xa Modimolle tanihi pfhumba ro lwisana na ntungu wa vuvabyi bya COVID-19 no engetela swibedhlele laha Xifundzeninkulu.

Xifunzankulu xa Limpopo sweswi hi vikaka xi na 5 746 wa timhangu ta xitsongwatsongwana xa Khorona, na mafu ya kwalomo ka 64. Xifundzhantsongo xa Capricorn hi xona xi rhangeke emahlweni hi timhangu loko ku pimanisiwa na swifundzhantsongo leswin’wana. Hambiswiritano, primiya wa Xifundzankulu u khensile nhlangano wa Xifundzankulu lowu tivekaka tanihi Provincial Command Council. U tlhandlekerile hi ku khensa na vaongori eka ntirho lowu va wu endlaka wa siku na siku wa ku lapha kusukela loko xitsongwatsongwana xa Khorona xi sungurile laha Afrika-Dzonga.

Sweswi hi vikaka tiko ri tsarisile nhlayo leyikulu ya mafu ya kwalomo ka 572 ya vuvabyi bya COVID-19 exikarhi ka 24 wa tiawara. Sweswi Afrika-Dzonga ri famba eka xiyimo xa vu5 emisaveni hinkwayo hi nhlayo ya 394 948 ya timhangu ta Khorona. Mfumo wu tekile xiboho xa leswaku tiko ri tshama eka levhele ya 3 ku fikela laha nhlayo ya vuvabyi yi hungutekaka.  MEC wa rihanyo, Dkd Phophi Ramathuba, u gimetile hi ku hlohlotela vaaki leswaku va fanele va tihlayisa hi ku tshama va landzelela milawu yo sivela ku andza ka ntungu wa vuvabyi COVID-19.


Spread the love

Leave a Reply

Your email address will not be published. Required fields are marked *