Switulu swa ndhawu ya mathekisi i swa vakhandziyi a hi so xavisela

Orlando Chauke

Dok Japisa Mathonsi, xirho xa komiti ehofisini ya meyara exifundzhenintsongo xa Mopani, loyi a khomerile meyara u hlamuserile bindzu ra mathekisi tani hi bindzu leri nga na madzolonga naswona ri fanele ku khomiwa hi ndlela ya vurhon’wana, a tlhela a kombela leswaku vam’wamathekisi va fanele ku landzelela swipimelo swa Covid-19.

Loko a vulavula hi nkarhi lowu a ku nyikeriwa ndhawu ya mathekisi, leyi a yi pfariwile nkarhinyana leswaku yi ta lulamisiwa, Mathonsi u komberile van’wamathekisi ku hoxa xandla eka ku lwisana na xitsongotsongwana xa Covid-19, ku papalata ku tluletana ka xitsongotsongwana eka vakhandziyi.

“Leswi a swi bohi leswaku mi voniwa hi maphorisa ya le magondzweni, kambe a hi ringeteni ku landzelela swipimelo swa Covid-19, hikuva ku tsandeka ku endla tano, swi ta hoxa xiave eka ku tlakusa timhangu ta vuvabyi lebyi etindhawini ta hina. Ndza pfumela leswaku na n’wina mi ya kumile mahungu ya leswaku vanhu va fa bya tinhongani hikokwalaho ka xinghunghumani lexi,” ku hlamusela Dok Mathonsi laha a nga kombela vachayeri vamathekisi ku tshika ku holova va tirha swin’we ku lwisana na xinghunghumani lexi.

“Ndza switwisisa leswaku bindzu ra mathekisi ri taleriwile hi madzolonga, laha vanhu va nga dlawa hi xitalo, kambe varhangeri lava nge eka bindzu leri namuntlha, mi na matimba ya ku herisa madzolonga ya mathekisi, naswona leswi swi nga koteka hi ku lulamisa ku hambana ka n’wina mi tirha swin’we ku vona leswaku milawu ya mfumo ya landzeleriwa,” wa hlamusela.

Ku ya hi yena, leswi swi katsa leswaku mathekisi ya fanele ku va la ma lulameleke ku famba emagondzweni, vacheyeri hinkwavo va fanele ku landzelela swipimelo swa Covid-19, xikan’we na ku yisa nxanxamelo wa mathekisi lawa ya nge le nawini leswaku ya kuma mpfuno kusuka eka mfumo.

U gimetile hi ku vula leswaku vafambisi va mathekisi va fanele ku papalata ku tirhisiwa hi vanhu va swidzidziharisi emathekisini hikuva leswi swi ta onha vumundzuku bya vaaki va le tindhawini ta Mopani. Hi ku angula, Alex Msimango, matsalani wa nhlangano wa mathekisi eGiyani, u khensile masipala wa Giyani ku va wu lulamisile ndhawu leyi ya mathekisi a tlhela a tshembhisa leswaku minhlangano hinkwayo ya mathekisi yi ta landzelela swipimelo swa mfumo naswona a va nge pfumeleri swidzidziharisi swi nghena eka ndhawu leyi.

‘Ku hundza emisaveni ka muaki hikokwalaho ka Covid-19, i ku lahlekeriwa swinene, tani hi leswi swi vulaka leswaku na hina hi lahlekeriwa hi mali ya mukhandziyi tani hi leswi bindzu ra hina ri tshembhelaka eka mali ya vaaki, hikokwalaho a hi nge veki rihanyo ra tikhasimende ta hina eka nghozi ya xitsongotsongwana lexi, naswona a hi  nge pfumeleri ndhawu leyi yi tirhisiwa ku fambisa swidzidziharisi.” Wa hlamusela a tlhela a tshembhisa leswaku va ta luma maphorisa ndleve loko va ehlleketelela maendlelo ya muxaka lowu.

Kasi meyara wa masipala wa Giyani, Basani Shibambu u komberile vafambisi va mathekisi leswaku va fanele ku teka vun’winyi bya ndhwu leyi ya mathekisi va vona leswaku ndhawu keyi yi tshama yi basile. “A hi lavi ku vona switulu swa vakhandziyi swi tirhisiwa hi vaxavisi, hikuva switulu leswi swi endleriwile vakhandziyi ntsena,” wa hlamusela laha a vuleke leswaku lava lavaka ku xavisa va fanele ku ya xavisa eka tindhawu leti vekiweke.