Gawula Classic yi yima eka xiyimo xa vumbirhi

Spread the love

Hi: Solomon Mathebula

Xipano xa Gawula Classic FC lexi tlangaka eka ligi ya SAB xa ha tshamile eka xiyimo xa vumbirhi eka logo. Xipano xitshamile eka xiyimo lexi kusukela loko xinghunghumana xa COVID-19 xi kavanyetile hi mintlangu ya bolo ya milenge hi n’hweti ya Nyenyenkulu lembe leri.

Mufambisi tlhelo n’wini wa xipano Giyani Shivambu, u hlamusele Nthavela leswaku ku nghenelela ka papa ra ntima ra vuvabyi bya Corona swi onhile swotala eka xipano.Tlhandlakambirhi, Shivambu engete a vula leswaku swi ta tika loko ligi yo hlwela ku pfula hikuva vatlangi vo tala va hangalakile, kasi van’wana va vona vale ka ntanga khume eswikolweni. “Gawula Classic FC xikombisile matlangelo ya kahle eka ligi ya SAB naswona a xitshembisa leswaku xi nga teka ligi kumbe kuya emaninginingini ya logo loko onge a ku nga nghenelela ntungu wa COVID-19,” ku hlamusela Shivambu.

Xipano xina mikutlunya ya 50 eka logo, naswona xisalele endzhaku hi mintlangu yi mbirhi loko xipimanisiwa na xipano xa Emmanuel FC lexi rhangeke emahlweni eka ligi ya SAB hi 55 wa mikutlunya. A swi se va rivaleni leswaku ligi ya SAB yi ta pfula rini leswaku swipano swi ta kota ku hetisa ligi ya nguva leyi. Xipano xa Gawula Classic FC xi nangutele kuya tlanga mintlango yo nghena eka ligi ya ABC Mostepe loko xo hlula swipano hikwaswo leswi swi nga eka ligi ya SAB.

Hambiswiritano, xipano xi vula leswaku swi tava ntlimbo nyana loko ligi ya SAB yi pfula hikuva ku ta laveka mali yo kamberisa vatlangi vuvabyi bya COVID-19, naswona xipano xi hava mali kumbe xikhwama xa seketelo wa swa timali.

“Ha swilava ku pfula ligi leswaku hi ta hundzela emahlweni, kambe hi hava mali yo yisa vatlangi va hina eka vaongeri ku ya kambela ntungu wa vuvabyi bya Corona. Loko mfumo awo swikota ku pfuna hi tlhelo rero a switava kahle, naswona swipano swita tlanga switshuxekile,” ku gimeta Shivambu.

 


Spread the love

Leave a Reply

Your email address will not be published. Required fields are marked *