Vaaki va na xiphiqo xa mati hikokwalaho ka phurojeke yo chelela vaaki mati.

Spread the love

Hi Andrew Hlongwane

Kwalomu ka madzanadzana wa vaaki vale mugangeni wa Nkomanini kusuhi na Nkowankowa ehandlenyana ka doroba ra Tzaneen kwala xifundzheninkulu xa Limpopo va tekile goza ro endzela mukhanselara wa vona wa wadi 18 kuya hlamusela xirilo xa mati.

Ku vuriwa leswaku sweswi swi endla n’hweti na mavhiki vaaki lava vari hava mati.

Kambe ku hlamuseriwa leswaku muvangi wa timhaka i mukhanselara wa vona.

Hi nkarhi wo endzela mukhanselara hi mahlo-ngati vaakatiko lava va kumile mukhanselara Norman Mukansi a nga ri kona emutini wa yena kambe va lavalavile ku fikela laha va nga hlangana na yena epatwini ra la kusuhi na vhengele ra ka Mulambo laha va nga boxetela swirilo swa vona.

Murhangeri wa vaakatiko lava Juwawa Simango u hlamuserile leswaku vaakatiko a va ri hava xiphiqo xo kala mati kusukela malembe ndzhaku kambe leswi swi sungurile loko ku tisiwile phurojeke yo chelela vaakatiko mati.

Kambe Simango u hlamuserile leswaku phurojeke leyi yi fikile yi chela phayiphi ya nsimbhi hilaha a ku ri na ya khale ku kombisa leswaku a va lavi vaakatiko va kuma mati.

Tinyiko Shipalana hi un’wana wa vaakatiko lava kalaka mati kambe u vile na nkateko wo kandziyisa hungu ra yena eka Nthavela.

“Mukhanselara wa hina a nga na mhaka na vaakatiko. Xa yena i ku tshembisa mavunwa eka vaakatiko. Sweswi u vulavula hi tivhaluvhu leswi hi nga swi tiviki leswaku u vulavula hi yini. Kambe wa rivala leswaku hi hina hi nga vhota leswaku a ta hi fuma”, ku vula Shipalana.

Hi nkarhi wa mburisano exikarhi ka mukhanselara Norman Mukansi na vaakatiko va Nkomanini a ku vanga na muhandzu wo nyawula.

Kambe vaakatiko va hlamuserile leswaku va ta teka goza rin’wana ro tlula mukhanselara va endzela tihofisi ta masipala hi ntshembo wa ku va ta ya pfuneka kona.

Mukhanselara u hlamuserile leswaku vaakatiko va muganga wa yena a va humi hi xitalo kuya vonisana hi swa muganga.

“Loko vaakatiko vo huma hi xitalo loko va rambiwa a swi ta olova swinene. A hi ta vonisana ngopfungopfu loko va humesa swibumabumelo. Kambe hi ta ringera ku burisana na lava va tirhanaka na swa mati kambe hi tshembisa leswaku xiphiqo xa vona xita hatliseriwa”, ku hlamusela Mukansi.


Spread the love

Leave a Reply

Your email address will not be published. Required fields are marked *