Ku fuma Minkawa exibhedlele xa Letaba

Spread the love

Vavabyi na vuendzi exibhedlele xa Letaba ehandlenyana ka doroba ra Tzaneen va kumeka va ri khombyeni siku na siku hikwalaho ka minkawa leyi kumekaka yi karhata.

Kuvuriwa leswaku xibhedlele xa Letaba xi hundzukile doroba ra va n’wankawa laha va kumaka swin’wana na swin’wana swodya.

Vaongori na vaendzi vo vhakela xibhedlele ku ya pfuxela maxaka ya vona etiwadini va ringetile ku endla xikombelo leswaku ku endliwa ndlela yin’wana yo susa makhamba lawa ya minkawa kambe hinkwaswo swihundzukile swi fana na tandza.

Ku tlula kwalaho minkawa yi tekile vulawuri exibhedlele xa Letaba hinkwaxo.

Hambi leswi xibedlele lexi xi nga duma swinene hi nkayivelo wa mimirhi ku tlhela ku pfuxela vanhu mabibi ya mbilu loko swi engetela hi ku xanisiwa hi va xivongo xa ka Mathebula.

Minkawa leyi yi tlula yi nghena etiwadhini hi mafasitere yi vutlela vavabyi swodya.

Swi tikomba yi tiva na nkari wo phameriwa vavabyi.

Loko u hlamula riqingo nakona u le khombyeni. U ta tekeriwa riqingo onge u famba eswitarateni swa le Joni.

Ku xava tibanana, xinkwa, vuswa kumbe ma apula u fanerile ku fambela ehenhla ka tandza leswaku vakulukumba va ka Mathebula va nga ku voni.

U n’wana wa vavabyi u hlamuserile phephahungu ra Nthavela leswaku minkawa leyi yi tikhome onge i vanhu.

“Maxaka ya mina va ndzi tiserile vuswa, mihandzunyana leswaku ndzi ta fihluta kambe kusuka ka vona ewadini ku vile nyimpi ya mfumo wa valungu na vanhu va ntima loko va lwela tiko. Kambe minkawa yi hetelerile hi ku vutla hinkwaswo yi kongoma e fasitereni yi ndzi siya ndzi bawulukile na milomo”, ku vule Ouma Mbalati.

Loko va phephahungu ra Nthavela va vhakela xibhedlele xa Letaba ku ya tiyisisa xirilo xa vavabyi na vuendzi hi hlamarisiwile loko hi vona minkawa yimbirhi yi nghena emovheni hi fasitere yi tlhela yi huma yi khomile swodya.

Un’wana u vutleriwe mabantsi na bege leyi a yi ri na swo hlamba.

Mukamberi Mishack Matlou wa Society for the Prevention of Cruelty to Animal (SPCA) ePitori u hlamuserile leswaku vanhu va fanerile ku lehisa timbilu eka xiyimo lexi nakona va pfumeleriwa ku bela va hlayisi va Ntumbuluko riqingo leswaku va ta pfuna.

“Vanhu va fanerile ku switiva leswaku xibhedlele xa Letaba xi akiwile eka khale ka nhova laha minkawa a yi tshama kona. Kambe hi endla xikombelo leswaku vanhu va nga yi vavisi hikuva loko wo kumeka u nga ti kuma u ri ejele”, ku vula Matlou.

Matlou u hlamuserile Nthavela leswaku va switiva kahle leswaku ku na swihari leswi eLetaba kambe swi lavana na swakudya.


Spread the love

Leave a Reply

Your email address will not be published. Required fields are marked *