Ndzilo wu siya ndyangu wu ri hava ko tumbeta Nhloko

Spread the love

Lembe rin’wana na rin’wana loko ku fika n’hweti leyi ya Khotavuxika ndyangu wun’wana na wun’wana wu va wu ti lunghiserile ku lwisana na xirhami.

Hambi vana va xikolo va boheka ku pfuka ra ha lo byihala kambe swi nga olovi.

Kambe ndzilo wu hawurile hinkwaswo wu siya ndyangu lowu wa Justice Mabasa wa makumembiri nkaye wa malembe wu ri hava xo finingela, xodya, ko tumbela hambi kuri swo mbala.

Mabasa wa le Lusaka ehandlenyana ka doroba ra Tzaneen kwala xifundzankulu xa Limpopo u hlamuserile hi laha mhangu yi nga humelerisa xiswona.

Mabasa u hlamuserile leswaku yena na ndyangu wa yena a va nga ri kona loko ku humelela mhangu leyi kambe u nghenile eka xigwitsirisi loko a kuma riqingo kusuka eka vaakelana leswaku yindlu ya yena yi le ku tshweni.

“Akuri ti 6 ta Khotavuxika ku nga n’hweti leyi loko mina na ndyangu wa mina hi vhakele maxaka eZangoma laha a kuri na ntlangu kona kambe hi sukile kwalomu ka awara ya nkombo hi sungule hi ku heleketa van’wana va maxaka eka Shiluvana ehandlenyana ka Rita. Kambe ndzi kumile riqingo loko hi ngase fika leswaku yindlu ya mina yile ku tshweni”, ku vula Mabasa.

Hambi swiritano vaakelana va ringetile ku timela ndzilo kambe wu alerile ku fikela nhundzu hinkwayo yi helela.

Loko Mabasa a fika ndzilo a wu hetile ntirho kuri hava na xo rilela.

Hinkwaswo a swi hundzukile nkuma nakona yindlu yi lo lokohlo.

Mabasa u hlamuserile phephahungu ra Nthavela leswaku u lovile nhundzu yo tala swinene, mali yo ringana R3 800.00 ya xitokofela, switifikheti swa vona ku katsa na maphepha ya timovha ta yena timbiri kunga Polo na Bantum.

Mabasa u lovile nhundzu ku katsa na yindlu leswi endlaka R180 000 ehandle ka R3 800 ya xitokofela.

“Tibuku ta n’wana na ti jinifomo na tona ti helele ndzilweni. Sweswi ndzi hava ko rilela”, ku vula Mabasa.

Un’wana wa vaakelana lava nga lwisana na ndzilo lowu, Petros Maswanganye u hlamuserile leswaku swi tekile nkarhi wo leha swinene ku lwisana na ndzilo lowu.

“Ndzilo lowu a wuri nghozi swinene leswi swi nga endla leswaku hi hetelela hi yima hi hlalela loko nhundzu yi dyiwa hi ndzilo. Kambe hi ringetile ku sivela leswaku wu nga tluleli laha a ku ri na tihuku”, ku vula Maswanganye.

Xivangelo xa ndzilo a xi sitiveka kufikela sweswi kambe maphorisa ya Ritavi va ha endla vulavisisi.

Loko kuri na musamariya loyi a lavaka ku chela xandla kumbe ku pfuneta hi ndlela yin’wana na yin’wana wa pfumeleriwa ku bela riqingo eka nomboro leyi 083 750 4113.

 

 


Spread the love

Leave a Reply

Your email address will not be published. Required fields are marked *