Swidzidziharisi swi onha vantshwa

Maphorisa ya xitichi xa Ritavi eNkowankowa ehandlenyana ka doroba ra Tzaneen va simeka pfumba ro kukula swidzidziharisi etikweni ra vona.
Ku tlula makumentlhanu wa vantshwa va khomiwile ku sukela hi n’hweti ya N’wendzamhala ku fika sweswi endzaku ka loko va kumekile va tirhisa swidzidziharisi loko van’wana va khomeriwile ku xavisa swidzidziharisi.
Maphorisa xikan’we-kan’we na valangi kunga va muganga lava rhangeriwaka hi tatana Joe Rikhotso eLusaka na tatana Mavhavaza Makhubele eNkomanini va kombisile ku tiyimisela eka ku lwisana na vukuungundzwana loko wa vhakela tindhawu leti ti tivekaka swinene hi ku tirisa swidzidziharisi leswi.
Leswi swi katsa na tin’wana ta tikotasi laha van’wana va kona kunga valungu.
Eka nkari lowu wa pfhumba ro lwisana na swidzidziharisi ku kumiwile timbangi, swidzidziharisi ku katsa na tinayiti timbiri ti ri na ngati endzeni ka tona.
Ku vuriwa leswaku tinayiti leti va dzahisa un’we va vona kufikela angahakoti nchumu loko va heta va koka ngati ya yena hi nayiti leyi va heta va titlhavetela va chela ngati liya emimirini ya vona leswaku vata dhakwa navona.
Xivutiso eka vanhu hi lexi xana va hlayisekile ku fikela kwini loko swita ekutluletaneni ka mavabyi.
Madokodela va hlamusela leswaku kuhava xilo xo olova ekutluleteni ka mavabyi ku fana na ngati.
Kuvuriwa leswaku ngati yi tluleta vuvabyi byi n’wana na byi n’wana ku olova.
Un’wana wa vanhu lava vo tirhisa swidzidziharisi kambe a ri mulungu u hlamuserile leswaku a swinge olovi leswaku a tshika ku dzaha hikuva swi le ngatini.
“Loko ro xa ndzi nga dzahi ndzi twa onge ndzi file. Kahle-kahle swi ta tika leswaku ndzi tshika swidzahadzahani”, ku hlamusela un’wana wa vadzahi va swidzidziharisi.
Manana Gavaza Mawila a nga muvulavuleri wa xitichi xa maphorisa xa Ritavi u hlamuserile leswaku pfhumba leri ri ta va na mihandzu ya kahle hikuva va tirhisana na vaakatiko.
“Hi khensa ntirhisano kusuka eka vaakatiko. Hikombela leswaku vaakatiko va ya mahlweni no hi luma ndleve. Leswi swi ta hi pfuna ngopfu kumbe swa hi olovela ku kuma hambi kuri makhamba”, ku vule Mawila.
Hambiswiritano maphorisa va khensa vaakatiko hi leswi vanga chela xiyandla eku lwisaneni na vugevenga etindhawini ta Ritavi.
Kuvuriwa leswaku vugevenga byi le hansi swinene hikokwalaho ka ntirhisano.