Mapasi ya kumiwa eka ndhawu ya swidzidziharisi eNkowankowa

Hi Andrew Hlongwane.

Loko munhu a lahlekeriwa hi xibukwana xa nghohe, karata ro vekisa mali kumbe karata ro chayela, xo sungula lexi a faneleke ku xi endla i ku tsutsumela exitichini xa maphorisa ku vika khombo leri.
Eminkarhini yin’wana u va u vutleriwile hi makhamba kambe switandzaku swa kona i ku swilo swa wena swi nga ha tirhisiwa ku endla swikweleti kumbe va humesa mali ya wena.
Kambe va valangi va le Nkomanini ehansi ka vurhangeri bya tatana Lighty “Mavhavaza” Makhubele va endlile xihlamariso loko va ednzela ndhawu leyi vitaniwaka ma4Room eNkowankowa ehandlenyana ka doroba ra Tzaneen kwala xifundzankulu xa Limpopo.
Vuendzi bya vona byi vile na mihandzu leyinene swinene.
Tatana Makhubele u hlamuserile phephahungu ra Nthavela leswaku xikongomelo xa vona a kuri ku ya hlasela majaha kumbe vantshwa lava tumbelaka eMa4Room va tirhisa swidzidziharisi loko va ta ku tekeni ka mapasi, makarata yo chayela xikan’we na ya bangi.
Kambe va tekile nhundzu hinkwayo va yi heleketa exitichini xa maphorisa xa Ritavi.
Hambi swiritano a ku khomiwangi munhu eka nkarhi wa kona.
Loko hi teka hungu hi ri tlherisela endzhaku, muganga wa Nkowankowa wu le kusuhi na ti ndhawu to fana na Dan, Lusaka na Mokgolobotho kunga tindhawu leti ti nga tala hi vantshwa lava endlaka swintlawana swa Mabhokoharamu na Ma16boys la ha vanhu lavakulu a va losa eka vantshwa.
Swi le rivaleni leswaku vantshwa la va tumbelaka eMa4Room i vantshwa vo suka eka swintlawana kambe va yiva xin’wana na xin’wana lexi va nga ta kota ku xava swidzidziharisi kunga ti nyawupe.
Eka mhangu ya mapasi, Sejeni Gavaza Mawila kunga muvulavuleri wa xitichi xa Ritavi u endlile xikombelo eka vaaki leswaku va tilangutela eka makhamba ngopfu ngopfu eka va nyawupe.
Mawila u tlhele a kombela lava va nga lahlekeriwa hi mapasi, makarata yo chayela xikan’we kan’we na ya bangi leswaku va endzela xitichi xa Ritavi kumbe va nga va na nkateko wo kuma nhundzu ya vona.
Emahetelelweni tatana Lighty Mavhavaza Makhubele va tivisa vaakatiko leswaku va boxa laha makhamba va tumbelaka kona.
“N’wina va nyawupe mi tivonela loko mi nga tshiki ku yiva hi kona hina valandzeri”, ku vula Makhubele