Xipano xa Juvestars United FC

Hi Andrew Hlongwane

Joseph “Reagan” Nukeri wa makumembiri ntsevu wa malembe hi vukhale hi un’wana wa majaha lawa ya nga karhata swinene hiku komisa akuri murhangeri wa majaha ya ntlawa wa Bokoharamu emugangeni wa Nkomanini na Lusaka kusuhi na Nkowankowa ehandle-nyana ka dobora ra Tzaneen kwala xifundzeninkulu xa Limpopo.
Nukeri u cherile tiko ra Dan emaninginingini hi mintirho yo biha yo fana na ku dlaya, ku vavisa hambi ku ri vukhamba hinkwabyo xikan’we na ku pfinya.
Hi lembe ra 2017 Nukeri u tiheleketile exitichini xa maphorisa ya Ritavi endzhaku ka loko ku rhumeriwile maberete ya ta hlotana na yena eka nandzu wo dlaya.
Nukeri u tshamile ejele ku ringana malembe manharhu endzhaka loko ku herisiwile nandzu wo dlaya.
Kambe ku vuya ka Nukeri swi kombisa ku cinca swinene.
Nukeri u rhambile va phephahungu ra hina ra Nthavela leswaku a ta hlamusela hi laha swi endlaka leswaku majaha ya huma epatweni.
Reagan u hlamusela leswaku ku hambana na vanghana swa pfuna nakona vantshwa vo tala va humesiwa ndleleni hi mhaka ya dyana dyana ni ta ku lamulela kambe loko ri ku pelela u ta cina hangayivona u ri wexe.
Sweswi Reagan u hlamusela leswaku swa jele u kombela swi fambela kule.
“Tiko ra hina swi tikomba kahle leswaku vantshwa a hi tekeriwi enhlokweni, vurhangeri bya hina byi hi pfalela handle. Sweswi hi mpfhuka ndzi vuyile ejele ndzi tinyiketerile ku hluvukisa ndhawu ya hina ni ku cinca vantshwa va langutana kumbe va teka goza lerinene”, ku vula Nukeri.
Sweswi Nukeri u rhangela a tlhela a dzabela xipano xa Juvestars United Football Club kunga xipano xa bolo ya milenge xa vana va majaha na va n’hwanyana va malembe ya khume nharhu ku fikela eka va khume nkombo.
Kambe xiphiqo xa Nukeri u hlamusela leswaku va Masipala wa Tzaneen a va tikombisi na ka ntsongo ku seketela mintirho leyinene leyi endliwaka hi vantshwa. U hlamusela leswaku ku navela ka yena i ku vumba vantshwa leswaku va va na vumundzuku lebyinene.
Hambi leswi Nukeri a hlamuselaka leswaku swikombelo swa yena na vaka masipala swo kombela ti bolo na switirhisiwa swin’wana swa bolo ya milenge swi fana na tandza.
U tlhele a hlamusela leswaku swin’wana swa swivangelo swa vukhamba hi sweswi swo tshama va nga tekeli vantshwa enhlokweni.
“Nikombela eka va n’wa mabhindzu leswaku va hi pfuna hi ku hi xavela timpahla to tlanga bholo ya milenge kumbe va chela xandla hi ndlela yin’wana na yin’wana.
Va vukosi bya ka Nkuna va khensile Reagan eka miehlehleketo ya kahle swonghasi.