Miss Teen Limpopo 2023 U nyikerile hi Tintangu ta Xikolo eka Swikolo swa le Hansi na Special school swa laha kaya

KA-MHINGA – Rixongile Helani, Miss Teen Limpopo 2023, u endlile masungulo yo hlamarisa eka ku fuma ka yena hi ku nsimeka Charity event eka swikolo swa le hansi swo tlula ntlhanu, leswi swi kumekaku emugangeni wa ka Mhinga, kasi swikolo leswi swi katsa Mhinga Special School, Rhangani Primary School, Mahlamba-ndlopfu na swin’wana.

Event, leyi yi vile kona hi Mugqivela 06 Mudyaxihi 2023, naswona a yi khomeriwile eKerekeni ya Assemblies of God eka Mhinga ehandle ka Saselamani ehansi ka Masipala wa Collins Chabane, laha N’wamburi Rixongile a nga nyikela hi tintangu ta xikolo na swin’wana swa nkoka eka swichudeni.

Leyi i yin’wani ya ti Event leyi nga ta tshama eminon’hweni ya vaaki ku ringani karhi wo leha swinene,tanihi laha swichudeni swo tala ni mindyangu ya swona vanga kuma swilo leswi nga ta va pfuna eka riendzo ra vona ra xikolo. Rixongile, u tiveka tanihi munhu loyi a nkucetelaka vana kumbe vanhu votala leswaku va rhangisa dyondzo emahlweni.

Loko N’wamburi a burisana na Phephahungu ra Nthavela u vurile leswaku “ Event leyi yi kongomisiwile eka ku pfuna swichudeni leswi humaka eka mindyangu yo pfumala naswona na vanhu lava va tsandekaku ku fikelela swilaveko swa xikolo,”

“Ndzi tsakile swinene ku va ndzi vile na nkateko wo tlherisela eka vaaki va laha ndzi humaka kona hi ndlela leyi[a vula hi ku nyikela ka yena eka vana va xikolo]. Dyondzo i masungulo, naswona i swa nkoka leswaku hi nyika matimba eka vana kumbe vantshwa va hina hi switirhisiwa leswi va swi lavaka ku endla leswaku va humelela,” ku vula Miss Limpopo Teen 2023 Rixongile.

Rixongile u ye emahlweni a ku “ Manana u ndzi pfunile, ku hlawa swikolo leswi swi amukeleke tinyiko namuntlha, tani hi leswi ndzi seketelaka dyondzo exikarhi ka vantshwa na munhu u n’wana na u n’wana. I swa nkoka eka mina ku tlherisela eka vaaki lava, tani hi leswi va ndzi kuriseke,” Loko a ya emahlweni u vurile leswaku “Eku heteleleni, ndzi hlawule swikolo leswi tanihi leswi swi nga xiphemu xa muganga wa ka hina.”

Loko swita ka vanhu lava van’wi pfunaka leswaku tirho wu humelela, u vurile leswaku u rhanda ku khensa ka vanhu hikwavo, lava vanga hoxa xandla leswaku siku ra Mugqivela riva matimu evuton’wini bya yena.  Kasi van’wani lava vanga hoxa xandla ku katsa mufundhisi wa wena, wo huma eKerekeni ya lani a kumekaku kona ePolokwane, xikanwe na manana wa yena lava vanga tlanga xiave xikulu hi kun’wi pfuna ku lava vaseketeri leswaku ntirho wu va wa xiyimo xa le henhla.

Kasi ntirho lowu a wu ngheneleriwile hi varhangeri va vaaki va ndhawu ya ka mhinga ku katsa na Hosi Mhinga wa wu mbirhi [Chef Mhinga 2], loyi a bumabumeleke Rixongile eka matshalatshala ya yena yo tlakusa vaaki. Hosi Mhinga u kombisile ku nkhensa ka yena eka N’wamburi ku teka goza ro endla ntirho wa nkoka swonghasi, lowu nga ta va na nkucetelo lowunene eka vutomi bya swichudeni endhawini ya ka Mhinga.

“Loko Sesi Tsaki va hi khumba eka swiyenge swa mabulo va kombela leswaku hi vhota, a hinga vutisi swotala a ho teka tifoni ta hina hi sungula ku vhota, naswona sweswi loko Rixongile a ta hlula leswaku a va n’wamburi eLimpopo, hi n’wi nyikile nseketelo wa hina hi ku tirhisa vhoti ya hina,” ku vula Hosi Mhinga.

Kasi Dkd Mathebula va nyikile marito yo hlohlotela no tlhela vakhensa Rixongile kuva a kotile ku nyikela eka swichudeni swa kwala tikweni ra ka mhinga. “ Rixongile, a wu cindi hikuva a wu kukuleli kule kambe u kukulela kwala kusuhi u sukaku kona, naswona i swa risima,”

Xin’wani xa xi vulavuli eka ntirho lowu a ku ri Manana Maluleleke tani hi leswi a va yimela masipala, va vurile leswaku Masipala wa Collins Chabane wu famba mahlweni loko swita eka n’wamburi tani leswi,Miss South Afrika wa 2020 a kuri Shundufhadzo Musida, kuve na Miss Collins Chabane kasi sweswi ehansi ka Masipala wa Collins Chabane kuna miss Limpopo Teen 2023 kunga Rixongile.

Ku tinyiketela ka N’wa Mburi Rixongile eka nhluvukiso wa vaaki i nhlohlotelo eka vo tala, naswona se u hoxe xandla swinene eka vutomi bya lava va nga ekusuhi na yena. Ku tinyiketela ka yena eka dyondzo na ku nyika matimba eka vantshwa i vumbhoni bya muxaka wa murhangeri loyi a nga na xivono lexi xinga ta pfuna na vanhu va le handle hambi ku ri va le kusuhi na yena.

Kasi vatshwari lava vana va vona vanga kuma tinyiko kusuka ka N’wamburi Rixongile va humesile matitwelo ya vona, lani kokwana wa Nkoka Khosa a nga vula leswaku “Ntukulu wa mina u vile na nhlahla swinene kuva a hlawuriwile eka vana lava vo tala lava va pfumalaka,”

“ A hi yena a pfumalaka a ri yexe kambe vatele lava va pfumalaka, ndzi twa xikwembu xiri kahle swinene, naswona ndzi khensa na Rixongile kuva a vonile ku ntikeriwa kumbe ku pfumala ka hina,” ku Vula Kokwani wa Nkoka Khosa.

Loko va ya emahlweni va vurile leswaku, “ Xikwembu a xi n’wi engeteli masiku ya ku hanya naswona a yi mahlweni a nyikela eka lava va pfumalaka.” Kasi na mutshwari u n’wana loyi vana va yena vari vambirhi vanga nyikeriwa hi tinthangu u vurile leswaku,” mina ndzi rhandza ku khensa swinene kuva xikwembu xi olovisile mbilu ya Rixongile kuva a kotile ku yingisela swirilo swa hina a ri kule.”

Kasi vana lava vanga nyikeriwa hi tintanghu va vurile leswaku “ndzi tsakile kuva u n’wana wa vana lava vanga kuma tintangu ka siku ra namuntlha,” lawa I marito man’wana loyi a nga kuma tintangu. Kasi Calfonia Baloyi kusuka exikolweni xa le hansi xa Mahlamba-ndlopfu, u vurile leswaku, “Ndzi titwa kahle ku va vani ndzi hlawurile kuva u n’wani wa vana lava vanga nyikeriwa ka siku ra namuntlha.”

Tanihi Miss Teen Limpopo 2023, Rixongile u sungurile gondzo ra yena ra n’wa mburi hi xiyimo xa le henhla, naswona swi le rivaleni leswaku u ta ya emahlweni a endla nhluvuko lowunene hi nkarhi wa wena tani hi n’wa mburi.  Tanihi leswi a hlamuselaka leswaku ntirho lowu wa ku nyikela eka swikolo swa le hansi eka ndhawu ya ka Mhinga i masungulo.

Rixongile u vurile leswaku “Ndzi na mienhleketo ya ku endla mphikizano wa n’wa mburi laha ka Mhinga, karhi wa mina wu nga se fika emakumu tani hi Miss Teen Limpopo 2023 ku nyika van’wana nkarhi lowu fanaka na lowu ndzi nga na nkateko wo va na wona. A hi hinkwavo lava nyikiwaka nkarhi lowu, hikwalaho ndzi hisekela ku sungula leswi ku pfuna vanhu van’wani lava vangana ku tsakela.”

“Ndzi ta hisekela eka matshalatshala ya mina ya ku nyika, hikuva leswi swi ndzi dyondzisile ku va na tintswalo na ku kombisa rirhandzu na ku titsongahata’” ku engeta Rixongile.

Kasi Phephahungu ra Observe Polokwane ri vikile leswaku N’wamburi Rixongile u endla hinkwaswo leswi a nga swi kotaka ku tisa kumbe ku endla ku hambana emisaveni, sweswinyana u nyikele hi swilaveko swo fana na ti nappies, ti wipes, na swiambalo kumbe mikumba eka muti wa ka Ngwana.

N’wana loyi wa malembe ya 15 hi vukhale u hanya hi marito lawa “u nga languteli ku vona ku cinca, loko unga endli ku cinca” Marito lawa hi wona ya n’wi pfunaka ku tisa ku hambana evuton’wini bya van’wani.

Loko hi ri kusuhi no heta mburisano wa hina, N’wa Mburi u hi hlamuserile hi riendzo ra yena tani hi Miss Teen Limpopo 2023, “Riendzo leri ve na mintlhontlho yo tala swinene. Ndzi nghenelerile eka mphikizano yinharhu yo hambana-hambana ya ti-Pageants, ku nga ri na wun’we lowu ndzi wu hluleke”

“Leswi hi ntumbuluko swi ndzi heta matimba, hambiswiritano, hi nseketelo wa manana ni swirho swin’wana swa ndyangu ndzi tiyiserile. Ku hlula ka mina ko sungula eka mphikizano a ku ri Miss Capricorn naswona ndzi nyikiwile sagwadi ra 1st Princess. Ndzi ye emahlweni ndzi nghenela eka miphikizano yin’wana yo hlaya swinene ku kondza ndzi fikelela lani ndzi nga kona namuntlha,” ku ngimeta Miss Teen Limpopo Rixongile.