Swichudeni swa UNIVEN swi ntshunxiwa hi Beyili
Bornwise Mafumo, Matsalanankulu wa Huvo ya Vayimeri va Machudeni ya Yunivhesiti ya Venda (SRC), u hehle yunivhesiti hi ku rhumela maphorisa ku lwisana na swichudeni leswi kombisaka ku vilela handle ka ku humesa vumbhoni lebyi kombisaka ku hoxa xandla ka vona eka madzolonga lawa ku hehliwaka leswaku va ma endlile.
Leswi swiva kona endzhaku ka ku khomiwa na ku ntshunxiwa hi beyili ka swichudeni swa mune ku nga Gudani Tshamano, Vhutshilo Luthingi, Lufuno Mutepe, na Elekanyani Nedzanani. Swichudeni leswi swi khomiwile mayelana na swi hehlo leswaku swi nghenelerile eka ku kombisa ku vilela ka swichudeni mavhiki lawa ya hundzaka loku hundzukeke madzolonga.
Eka karhi wa sweswe, Un’wana na un’wana wa swichudeni leswi u nyikiwile beyili ya R1500 hi khoto ya majisitarata ya Thohoyandou hi Ravunharhu.
Mafumo, loko a vulavula hi ku yimela SRC, u kombisile ku vilela mayelana na swiendlo swa yunivhesiti eka ku kombisa ku vilela ka swichudeni.
U vula leswaku “ ku khoma swichudeni loko swi ri karhi swi humesa swivilelo swa swona eka timhaka ta nkoka leti swi khumbaka a swi siveli ntsena ntshunxeko wa swona wo vulavula kambe swi tlhela swi xungeta ndhavuko wa ku lwela swichudeni ekhampasini.”
Swihehlo leswi hehliwaka swichudeni leswi swa mune swi katsa madzolonga, ku onhiwa ka switirhisiwa swa nkoka, na ku onha nhundzu hi ndlela yo biha.
Milandzu ya vona yi hundziseriwe emahlweni eka siku ra vu 8 ra nhweti ya N’wendzamhala ku nyika Maphorisa karhi wo endla vulavisisi byin’wana
