Ntsheketo wa Nghwazi: Minyikelo ya Tonic Chabalala eka vaaki

Hi Ntsakisi Gracia Chauke

tiindasitiri ta mintlangu ni ta vunyanyuri ta fambisana naswona nhlayo ya Vatsonga loko yi pimanisiwa na tinxaka tin’wana yi le hansi swinene eka tiindasitiri leti. hambiswiritano, vanhu vo fana na Tonic Chabalala va swikotile ku fikelela hi ndlela yo humelela eka vunyanyuri bya mintlangu ku nga khathariseki leswaku va huma kwihi.

Tonic Chabalala i khale ka mutlangi wa bolo ya milenge tlhelo musunguri wa Tonic Chabalala Foundation loyi a velekiweke no kurisiwa emugangeni wa Xitlhelani ehandle nyana ka Malamulele. Chabalala u tlangele swipano swo fana na Dynamos, Thanda Royal Zulu na xipano xa ndhuma xa Orlando Pirates laha a nga tlhela a va mukaputeni wa xipano lexi.

Kasi leswi ko va xikombiso xa kahle xo kombisa leswaku lexi nga xa nkoka a hi laha u humaka kona, leswi u nga na swona kumbe leswi u pfumalaka swona. Kambe xa nkoka hi leswaku u va na norho na ku tiyisisa leswaku norho wa wena wa humelela.

Eka mbulavurisano wo anama na Nthavela vhiki leri, Chabalala u vule leswaku u hlohloteriwile hi xipano xa laha kaya xa Langutani Blue Birds FC ku va mutlangi wa bolo ya milenge.

“A ku ri na xipano lexi a xi vitaniwa Langutani Blue Birds lexi hi nga kula hi karhi hi vona va tlanga bolo ya kahle swinene leswi hi swin’wana swa leswi nga endla leswaku ni va na ku navela eka bolo ya milenge,” ku vula Chabalala.

U ye emahlweni a hlamusela leswaku ku tlheli ku va mutlangi wun’wana loyi khombo ra kona se a nga hundza emisaveni, a tiveka hi vito ra Selby Chauke naswona hi wun’wana wa vanhu vo sungula ku suka kwahala ka miganga ya Malamulele ku tlangela swipano leswikulu.
“Selby Chauke hi wun’wana wa vanhu lava ani langutela eka vona no tlhela va endla leswaku ni va na nhlohlotelo wa ku tlanga bolo ya milenge leswi nga endla leswaku ni kota no kondelela hambi loko swi nga olovi,” ku hlamusela Chabalala.

Mayelana no tsunduxa vantshwa, Chabalala u vule leswaku ku tirha hi matimba na ku tinyiketela swa hakela. “Minkarhi ya khale na ya sweswi yi hambanile, eka nkarhi wa khale a swi nga olovi ngopfu ku va munhu a kota ku boxeketa. Kasi sweswi ku na matshalatshala yo tala ya bolo lawa ya endliwaka ku fana na tithonamente ta Tonic Chabalala Foundation hambi ku ri ligi ya ABC Motsepe.”

“Lexikulu i ku va munhu a tirha hi matimba na hi ku tiyimisela. ku titshemba i xilotlelo. Munhu u fanele ku pfumela eka vuswikoti bya yena naswona a nga tshuki a kanakana,” a engetela.

Chabalala u sungurile Tonic Chabalala Foundation hi xikongomelo xo lava ku pfuna na ku vuyisela swo karhi eka miganga ya Malamulele hambi ku ri ku hoxa xandla eka nhluvukiso wa vaaki.

“tanihi Tonic Chabalala Foundation a ho vo na xipano xa bolo ntsena kumbe ku simeka tithonamente kambe ku na swilu swo tala leswi hi ti nghenelerisaka eka swona ku ri ndlela yo khutaza no hunguta vusweti emigangeni ya Malamulele. Ha endzela swikolo swo tala laha hi fikaka hi hlohlotela, kasi machudeni lawa ya pasaka kahle ha kota ku va nyikela hi switifikheti leswi nga ha hlohlotelaka leswaku va ya emahlweni va tirha hi ku hiseka,” ku hlamusela Chabalala.

Loko a ya emahlweni u vule leswaku, “nkarhi wun’wana hi ya eswikolweni ku ya hlawula swichudeni leswi pfumalaka yunifomo ya xikolo laha hi kotaka ku nyikela no tiyisisa leswaku swichudeni leswi swi languseka ku fana na vana van’wana.”

Chabalala u gimetile hi ku vula leswaku va swikota no famba va pfuna mindyangu leyi sweleke emigangeni yo karhi. Hambiswiritano, u tlhele a kombisa leswaku a nga tsaka ngopfu loko van’wamabindzu va ndhawu vo hlangana no tlhela va tirhisana eka ku pfuneta ku lwisana na vusweti.