Swipano swi phikizana hi Matimba
Hi Themba Chauke
Mphikizano wa Shawela Madrid wu sungurile hi Mugqivela hi mintlangu yo tsakisa tanihi leswi swipano swi phikizanelaka ku hlula no kuma masagwadi lamakulu. Mintlangu yo tala yo sungula yi hele ku tlangiwe hi ku ringana, leswi kombisaka ndlela leyi swipano swi phikizanaka ha yona ni ndlela leyi swi tiyimiseleke ku hlula ha yona.
Hi sagwadi lerikulu ra R50,000 leri languteriweke ku nyikiwa xipano lexi nga ta hlula, swipano swi endla matshalatshala ya swona hinkwawo ku tlanga hi matimba no lava ku hlula. Yin’wana ya mintlangu leyi a yi ri exikarhi ka Mushiyani Amagaza na Nkomo Phunya. Swipano leswi haswimbirhi swi lwile hi matimba kambe swihetelele swi nga howisanga goli leswi endleke leswaku ntlangu wu fika emakumu kuri 0:0. Ku tlanga hi ku ringana ku endle leswaku swi tika eka swipano leswimbirhi ku fikelela xiphemu lexi landzelaka. Tanihi leswi ku nga swipano swa tsevu ntsena leswi yaka emahlweni, ku sungula ku tlanga hi ku ringana swi va veka ekhombyeni eka mphikizano.
Leswi swipano swin’wana se swi nga hlula eka mintlangu ya swona, xipano xa Mushiyani Amagaza na xa Nkomo Phunya sweswi swi na ntlhontlho wo tika emahlweni. Swi fanele ku kuma mikutlunya leyi eneleke eka mintlangu ya swona leyi saleke leswaku swi tshama swi ri eka mphikizano. Loko mphikizano wu ri karhi wu ya emahlweni, varhandzi va bolo va tsakile ku vona leswaku hi xihi xipano lexi nga ta humelela no kuma sagwadi ra le henhla na hakelo ya mali.
“Ku ringana eka ntlangu wo sungula swi fana na ku sungula mphikizano endzhaku ka van’wana,” ku vula muhlaleri wa bolo, David Baloyi. “Swipano leswi swi fanele ku tirha hi matimba, swi antswisa ntlangu wa swona, na ku tiyisisa ku tshama eka mphikizano,” ku engetela yena. Loko mphikizano wu ya emahlweni, ntshikilelo wu ta engeteleka. Swipano swo fana na Mushiyani Amagaza na Nkomo Phunya, leswi nga tlanga ku biha eka mintlangu ya swona yo sungula, swi fanele ku hatla swi cica matlangelo kutani swi nga ngheni ekhombyeni ro humesiwa ka ha ri na nkarhi. Mphikizano lowu wa tika naswona xiboho xin’wana ni xin’wana erivaleni xi nga endla xiboho xa leswaku i mani loyi a hlulaka kumbe a hluriwaka.
Mphikizano lowu, lowu sunguriweke hi Archie Shitlhavani, i wun’wana wa lowu hakelaka mali yo tala eGiyani. Xipano xa vumbirhi xi ta kuma R25,000, xipano xa vunharhu xi ta kuma R7,000, kasi xa vumune xi ta teka R5,000. Hi ku ya hi Shitlhavani, mali leyi hlengeletiweke eka mphikizano lowu yi pfuneta ku seketela mindyangu na vana lava pfumalaka eShawela. Tikhamphani to hlaya ti seketela mphikizano lowu, laha Standard Bank yi nga museketeri lonkulu. “Mphikizano lowu wu ta ya emahlweni ku ringana mavhiki mambirhi lama taka, hikokwalaho vanhu va khutaziwa ku endzela rivala ra mintlangu ra Shawela mahelo ya vhiki man’wana na man’wana ku ya hlalela swipano leswi va swi tsakelaka swi tlanga,” ku vula yena.
