Tlhotlhokwe FC yi nga ha endla matimu yo biha
Hi Themba Chauke
Tlhotlhokwe Golden Syrup FC yi le kusuhi no endla rhekhodo leyi nga laviwiki no khomisa tingana eka ligi ya ABC Motsepe. Xipano xi hluriwile nakambe hi Mugqivela, hi 1-0 loko xi tlanga na Munaca FC erivaleni ra mintlangu ro xona le kaya. Ku lahlekeriwa loku ka sweswinyana ku engetela eka nguva yo tika leyi Thlothlokwe FC yi langutaneke na yona, tanihi leswi va nga si hlulaka na ntlangu wun’we ku sukela loko ligi yi sungurile. Hi tinhla tinharhu ntsena eka mintlangu ya khume nharhu, vumundzuku bya vona eka ligi byi vonaka byi nga tiyiseki.
Ku tlanga ka vona hi ndlela yo biha swi va vekile eka xiyimo xo hetelela, naswona ku papalata ku yisiwa ehansi swi ta lava singita. Tinhla tinharhu leti va ti kumeke ti huma eka ku tlanga hi ku ringana ka nharhu, naswona va ha lava ku hlula ka vona ko sungula. Lexi nyanyisaka xiyimo xa vona hi leswaku Thlothlokwe FC i xin’wana xa swipano swimbirhi leswi nga tlakusiwa eka ligi ya ABC Motsepe eka nguva leyi nga hundza. Loko xo humesiwa, xi nga va xipano xo sungula eka malembe ya sweswinyana ku tlakusiwa ivi xi tlhelela ehansi eka nguva leyi fanaka.
Hambi leswi xipano xi nga ku kayakayeni, vanhu van’wana lava nga ekusuhi na xipano va xiye ku antswisiwa kutsongo eka matirhelo ya xona ku sukela loko nguva yi sungurile. Hambiswiritano, swi nga ha va swi nga ha koteki ku hundzula swilo. Mutirhi un’wana wa SAFA, loyi a pfunaka swipano swa ligi ya ABC Motsepe, u vule leswaku: “Khombo ra kona, Tlhotlhokwe yi lulamise swilo endzhaku ka nkarhi swinene. A ndzi ehleketi leswaku yi nga papalata ku yisiwa ehansi handle ka loko ku humelela nchumu wo hlamarisa.”
Ku tsandzeka ka xipano ku antswisa nguva ya xona swi siye valandzeri na vaseketeri va karhi va vilela swinene. Ku cinca ka Thlothlokwe FC ku suka eka ku va na ntshembo wo tlakusiwa ku ya eka ku va ekhombyeni ro yisiwa enhansi swi kombisa ndlela leyi swi nga tikaka ha yona eka swipano leswintshwa leswi tlakusiweke eka tiligi ta mphikizano.
Loko nguva yi ya emahlweni, vanhu hinkwavo va ta va va langutile Thlothlokwe FC ku vona loko va nga hundzula swilo. Hambiswiritano, leswi nkarhi wu helaka naswona matirhelo ya vona ya tsekatsekaka, khombo ra ku yisiwa eka xiyimo xa le hansi ri ya ri kula. Sweswi, xipano xi fanele ku kongomisa eka ku pfuxeta ku titshemba ka xona na ku lwela phoyinti yin’wana na yin’wana, loko ku koteka ka ku endla matimu lama nga laviwiki eka ligi ku lenga-lenga ehenhla ka xona.
