Riendzo ra King George eka bolo ya milenge

Hi Themba Chauke

Sithembiso George Miya, n’watipala wa vutshila loyi a nga na vuswikoti, u na xitori xo hlohlotela eka xivandla xa bolo ya milenge. U velekiwile no kurisiwa eSoweto exidorobanini xa Zola, riendzo ra yena eka bolo ya milenge ri kombisa ku tirha hi matimba ka yena, ku navela, na nseketelo wa ndyangu wa yena.

Miya loyi a tiviwaka tanihi King George eka xivandla xa bolo ya milenge, u kule ku tika. U lahlekeriwe hi vatswari va yena havambirhi loko ari na khume wa malembe hi  vukhale naswona u kurisiwile hi sesi wa yena Francinah na manana-ntsongo Sophie Miya. Ku nga khathariseki maxangu lawa, bolo ya milenge yi n’wi chavelerile ni ku n’wi nyika xikongomelo.

Riendzo ra bolo ya milenge ra Miya ri sungurile hi lembe ra 2004 loko a joyina xipano xa xikolo xa le hansi xa Esithebeni eSoweto. Xipano lexi a xi nga ri na n’watipala, kutani u endle xiboho xo teka xiphemu lexi. A nga swi tivi hi nkarhi wolowo leswaku ku hlawula loku a ku ta pfuxa rirhandzu ra yena eka kuva n’watipala naswona a ku ta n’wi yisa eku humeleleni.

Vutshila bya Miya na ku navela ka yena eka bolo ya milenge swi hatle swi va erivaleni, leswi pfuleke nyangwa wa vumundzuku byo vangama. A swi tekanga nkarhi wo leha vazaberi va nhluvukiso va Moroka Swallows va n’wi xiya kutani va n’wi rhamba ku joyina xipano xa vona xa vantshwa. Leswi a ku ri masungulo ya riendzo ra yena tanihi n’watipala wa xiphurofexinali.

Loko a khoma 21 wa malembe hi vukhale, Miya u endle goza ra nkoka eka ntirho wa yena wa bolo ya milenge hi ku ya eMopani ku ya ringeta na Bellevue Winners Park eka nguva ya 2016/17. Talenta ya yena na ku tirha hi matimba swi n’wi pfunile ku kuma ndhawu eka xipano. Hambiswiritano, nkarhi wa yena na Winners Park a wu ri na swiganga na swirhelelo. Xipano lexi xi hlule ligi leyi erivaleni, kambe hikwalaho ka swiphiqo swa vufambisi, xi lahlekeriwe hi xidlodlo endzhaku.

Miya u tshovekile mbilu hi vuyelo lebyi naswona u lwile hi matimba ku byi amukela. Loko n’wini wa Winners Park hi nkarhi walowo, Robert Mokgola, a teka xiboho xo xavisa xipano loko nguva leyintshwa yinga se sungula, Miya u rhurhele eDube Continental eka ligi ya  ABC Motsepe eGauteng. U ye emahlweni a antswisa vutshila bya yena na ku pfuna xipano xa yena lexintshwa, kambe a ha titwa a ri na vuxaka lebyi tiyeke na Winners Park.

Eka ku cinca loku hlamarisaka ka swiendlakalo, Mokgola u tlhele xava xipano xa Winners Park kutani a fonela Miya loko a ri na malembe ya 28 leswaku ata tlhela a joyina. Miya u vuyile eka xipano, kambe hi ku hatlisa u vone ku cinca kun’wana loko Mokgola a xavisa xipano nakambe, eka nkarhi lowu xipano xi xaviseriwe Dakalo Ramuthaga ku suka eka Xifundzhantsongo xa Vhembe.

Ehansi ka vulawuri byintshwa, Miya u titwe a ri ni xikongomelo lexintshwa ni ku va xiphemu xa xipano. U teke xiboho xo tshama na Winners Park eka nkarhi lowu, a tlangela ku amukeriwa hi mandla mambirhi na vufambisi bya xiphurofexinali lebyi Ramuthaga a byi tiseke loko a teka xipano.

“Ndzi tshemba leswaku hi vurhangeri bya mutshamaxitulu lontshwa, xipano xi ta tlakusiwa eka Motsepe Foundation Championship ku nga si hela tinguva timbirhi,” Miya u vurile hi ku tiyiseka. Ripfumelo ra Miya eka swikongomelo swa xipano na ku tinyiketela ka yena eka ku humelela ka xona swi tiyile loko a endliwa mukaputeni wa xipano, ntirho lowu a wu amukelaka hi ku titsongahata na ku tinyungubyisa.

Loko a anakanyisisa hi riendzo ra yena, Miya u kombisile ku khensa eka minkarhi leyi a nyikiweke yona, ngopfu ngopfu hi Ramuthaga, loyi a kombiseke kuva ni ripfumelo eka yena hambileswi xipano xi nga endliki kahle eka ligi sweswi. Tanihi mukaputeni, Miya u tiyimisele ku rhangela hi xikombiso, endzeni na le handle ka rivala, na ku pfuna Winners Park ku fikelela swiyimo leswintshwa.

Xitori xa Miya xi kombisa ku tirha hi matimba, ku tshembeka na vurhangeri. Kusuka eka ku kula eZola kuya eka kuva mukaputeni wa Winners Park, riendzo ra yena ri hlohlotela vatlangi va bolo ya milenge lavatsongo naswona ri kombisa leswaku hi matshalatshala, ripfumelo, na minkarhi leyi faneleke, milorho yinga hetiseka. U vule leswaku: “Ndzi khensa Xikwembu hikwalaho ka ku humelela ka riendzo ra mina.”