XIPANO XI GONYA NTSHAVA

Themba Chauke

Xipano xa bolo ya milenge xa Thlothlokwe Golden Syrup, xi le ku gonyeni ka ntshava leyi xi nga voniki nhlohlorhi ya kona hikokwalaho ko tshamela ro mbeyeteriwa endzhaku ka loko xi hluriwile 2-0 ekaya ka xona hi xipano xa Winners Park. Hambileswi xipano a xi tlanga emahlweni ka vaseketeri va xona, xipano xa Thlothlokwe xi tsandzekile ku tirhisa nkateko wo tlangela ekaya.

A ku languteriwile leswaku xipano xi ta kombisa matlangelo yo tiyimisela, leswaku xi ta vuyisa ntshembho eka vaseketeri lava se va sunguleke ku lahla thawula eka vuswikoti bya  xipano ku cinca matafula. Hambiswiritano, endzeni ka rivala timhaka a tihambanile hikuva timbila a ti rhurha. Ehandle ko hoxa ntshikelelo, xipano xa Thlothlokwe xi tikumile ku ri xona ehansi ka ntshikelelo wo pfumala ntangha hikokwalaho ka matlangelo yo tiyimisela ya xipano xa Winners Park.

Xipano xa vaendzi lexi na xona a xi tilavela mikutlunya ya nkoka tanihileswi nguva ya ligi yi fikaka evugimamusi, xi hlaserile xipano xa le kaya laha vatlangi va le ndzhaku va xipano xa le kaya a va vona xa ncila wa vuluvulu. Ku hluleka ka xipano xa Thlothlokwe swi siya vaseketeri va pfumala ntshembho eka vumundzuku bya xipano lebyi byi taleriweke hi xinyami.

Hi hala tlhelo, xipano xa Winners Park xi tikomba se xi humile eka xiyimo lexi nga tsakisiki, tanihileswi xi saleriweke hi nkutlunya wun’we ku kota ku fikelela swilaveko swo papalata xihloka. Ku ya hi milawu ya SAFA, xipano xin’wana na xin’wana lexi tshandzekaka ku fikelela mikutlunya ya 18, xi langutana na ku tsemiwa hi xihloka ehandle ko ehleketa ka mbirhi.

Enkarhini wa sweswi, xipano xa Winners Park xi kotile ku hlengeleta mikutlunya ya 17 eka mitlangu ya 18, naswona xi saleriwile hi mitlangu ya mune. Leswi swi xi veka eka xiyimo xa kahle loko xi fananisiwa na swipano leswi swi nga le hansi ka xona. Loko xo kota ku hlula eka ntlango wun’wana na wun’wana lowu wu landzelaka swi ta tiyisisa leswaku xipano xi papalata xihloka, hambi xo tlanga ku ringana eka ntlango wun’we ntsena eka leyi ya mune yi saleke xipano xi ta pona xihloka hikuva xi ta va xi fikelerile mikutlunya ya 18 leyi yi lavekaka leswaku xi ta yisa emahlweni na ku tlanga eka ligi leyi eka nguva leyitaka.

Hi hala tlhelo, xipano xa Thlothlokwe xi tikuma xi khome nyarhi hi timhondzo. Loko xona xi fanele ku papalata xihloka, xi fanele ku hlula eka mitlangu hinkwayo leyi saleke. Kambe a swi heleri kwalaho, xi tlhela xi tshembhela eka mimbuyelo ya swipano swin’wana leswaku xi kota ku pona. Ngopfu-ngopfu xi lava leswaku xipano xa Black Leopards xi lahlekeriwa hi mitlangu ya xona hinkwayo, hikuva xi na mikutlunya ya 15 ehenhla ka mitlangu ya 18. Leswi hi swona ntsena leswi nga ta endla leswaku xipano xa Thlothlokwe lexi xi nga na 8 wa mikutlunya eka mitlangu ya 18 xi kota ku hundza swipano leswi swi mbirhi ku pona xihloka.

Hi ku komisa, xipano xa Winners Park xi lava ntsena nkutlunya wun’we ku kota ku hefemula kahle, kasi ku pona ka xipano xa Thlothlokwe swi lava leswaku xipano xi hlula na ku hluriwa ka xipano xa Black Leopards. Leswi swi veka xipano xa Thlothlokwe eka ku pona xihloka eka hava. Entiyisweni, xipano a xi nge swikoti ku papalata xihloka.
Eka tlhelo rin’wana, loko xipano lexi xo tsandzeka ku vuyela eka ligi leyi eka nguva leyi yi taka, xi ta va xipano xo sungula eka malembe lawa ku fikelela ku tlanga eka ligi ya Motsepe na ku tlhela xi tsemiwa hi xihloka hi nguva yin’we.