Vuhungasi Bya Mintlangu

Hi MKATEKO NDLOVU

Xipano xa Xifaxani i xipano xa ntlango wa bolo ya milenge lexi simekiweke emugangeni wa ka Xikundu. Xipano lexi xi kondletela mahanyelo lamanene eka vana lavantsongo hi ku va dyondzisa ntlango wa bolo ya milenge xikan’we na ku papalata mikhuva yo biha yo tirhisisa swidzidziharisi.

Ku vuriwa leswaku loko va ri eka migingiriko yo tlanga bolo va pfumala nkarhi wa ku famba va endla swilo swo homboloka. Xipano xa Xifaxani xi pfumelela vanhu leswaku va komba xikan’we na ku kuma tinyiko ta vona hi ku kondletela na vutiolori eka vanhu. Ku tlhela ku endliwa na miphikizano ya swipano swo hambana-hambana emugangeni ku ri ndlela yin’wana yo seketela van’wamabindzu lava ha kasaka no hluvukisa ikhonomi ya muganga.

Xipano xi vile na ntirho wa mitlangu erivaleni ra mitlangu ra Njhiva laha a ku phikizana swipano swa nhungu leswi a swi nghenelerile mphikizano hi ntsengo wo ringana R300 hi xipano. Eka mphikizano lowu a ku languteriwile leswaku ku ta sala swipano swi mbirhi eka tifayinali leswaku swi ta phikizelana ntsengo lowu.

Phephahungu ra Nthavela ri kotile ku fikelela laha mphikizano lowu a wu humelela kona laha ri nga burisana na vafambisi va swipano lava va nga kombisa hi mitlhotlho leyi va hlanganaka na yona. “Hi hlangana ngopfu na mitlhotlho ya swa timali, nkarhi wun’wana ha tsandzeka ku nghenelela eka miphikizano yin’wana hi ku pfumala macheleni, loko hi kombela ku phalariwa van’wana vanhu va tsandzeka. Hi tikeriwa na hi swifambo loko hi fanele ku ya tlanga bolo ekule. Nkarhi wun’wana hi tlanga na vatlangi va le kule hi tsandzeka ku va fikelela hikokwalaho ko pfumala xo famba’’ Chauke John wa hlamusela.

Eka Mphikizano lowu xipano xa Xifaxani xi hlurile xipano xa Saselamani All Stars hi tibolo ta 5-4 hi tiphenati. Kasi xipano xa Bombasi xi hlurile xa Gonani 3-1, Manchester yona yi hlurile Khadani 6-2, loko Maphophe yihlurile Mabcity hi 1-0. “ Tanihi xipano xa Xifaxani hi titwa hi tsakile kuva hi kotile ku hlula eka mphikizano lowu. Swa tikomba leswaku tanihi hi vayimeri va xipano ha kha ha tirha ntirho wa hina, Eka malembe lawa ya landzelaka hi tsakela ku va hi tlanga na swipano swa le henhla swo fana na Kaizer Chiefs na Sundowns’’.Maluleke percy wa hlamusela.

Van’wana va vatlangi lava a va nghenelerile eka mphikizano lowu va nyikile mavonelo ya vona mayelana na ntlango lowu. “Hina hi titwa hi tsakile ku va hikotile ku hlula eka mphikizano lowu, swi hi hlohloterile ku tlanga hi matimba hi ya emahlweni’’ Heavyman Hlengani wa Manchester.

“Hina hi titwa hi tsakile hikuva hi kotile ku hlula 3-1 laha a hi tlanga na ntlawa lowu a wu ri xikwadi hina hi nga
ri xikwadi, hi titwa hi tsakile ngopfu ku va hi hlurile eka mphikizano lowu” Nhlanhla Maluleke mutlangi wa xipano xa Bombasi.

Hambiriswitano eka swipano swo hambana-hambana va kombisile mitlhotlho leyi va hlanganaka na yona , laha va nga kombisa leswaku ku kala macheleni swa va tikisela leswaku va nghenelela eka miphikizano yin’wana. Nkarhi wun’wana hi nyikiwa swiphiqho hi vatlangi loko hi va fonela a hi va kumi no tlhela va hlwela ku fika eku tlangeni ka bolo.

Xipano xa Xifaxani xi kombisa leswaku nkoka wa mitlangu leyi i ku hluvukisa tiko na ku hlohlotela majaha leswaku va tekela enhlokweni tinyiko ta vona xikan’we na ku hlohlotela vumundzuku lebyinene eka vona. Tanihi hi xipano xa Xifaxani va hlohlotela majaha lamantsongo leswaku loko va titwa va ri naku navela ku nghenelela eka swa mitlangu va fanele ku tihlanganisi na Maluleke Percy matsalani wa xipano xa Xifaxani.