Xiyimbeleri xi Lwisana na Madzolonga

Hi Tracy Novela

“Vunanga bya xitsonga hi leswi nga engatini ya Mina, naswona ndza swi rhandza ku kurisa ndzhavuko wa mina. Ndzi rhandza na leswi ndzi kumaka nseketelo ha kona eka vanhu lava va nga le kusuhi na mina" lawa i marito yo huma eka Chodo Mahlaule loyi a nga xiyimbeleri xa vunanga bya xitsonga.

Chodo u sungurile ku yimbelela vunanga bya xitsonga a ri na kwalomu ka ntsevu wa malembe, naswona leswi swi ta endzhaku ka ku rhandza khale ka xiyimbeleri lexi nga hundza misaveni ku nga Zahara laha a tshamela ro yimbelela vunanga bya Zahara ku nyanyula vatswari va yena lava va nga swi tekela enhlokweni leswaku u na nyiko.

Chodo u velekiwile emugangeni wa ka Xivulani etindhawini ta Giyani, naswona i n’wana wo sungula wa Calvin Mahlaule loyi a tivekaka tanihi mukhaselara na Deborah Mahlaule. Xiyimbeleri lexi i mudyondzi wa Giredi 8 laha a endlaka ti dyondzo ta Mathematics na Sayes. Tata wakwe Mahlaule u vule leswaku Chodo u na alibamu yin’we leyi nga kona eka ndhawu ta vuhlanganisi leti ti katsaka YouTube, live stream, na tin’wana, naswona alibamu leyi yi humile hi lembe ra 2023 laha a yi nyanyula vanhu hikuva a ri ka rhi a lwisana na madzolonga eka vana na va manana na le midyangwini.

“Mina tanihi mutswari wa yena ndzi rhandza leswaku a rhangisa timhaka ta dyondzo emahlweni, a tlhela a kula eka swa vunanga a nghenela na masagwadi yo hlaya tanihi xiyimbeleri xa wansati,” ku vula Mahlaule, tata wa Chodo.

“Xin’wana lexi xi ndzi tsakisaka hi vuyimbeleri bya yena hi leswaku byi kota ku yingiseriwa hi munhu un’wana na un’wana hikuva a byi na nhlambha, leswi ndzi nga vulaka leswaku u swi tekerile ekaya ku nga mina tatana wa yena, laha ndzi nga swi Kuma eka kokwani Phineas Mahlaule lava na vona va nga hundza misaveni Moya wa vona a wu yi emahlweni wu wisa hi kurhula.”

U ya emahlweni laha a nga tlhela a vula leswaku leswi u tlhele a swi tekela na le ka manana wa yena Sayina Mahlaule kusuka emugangeni wa ka N’wa Dzeku-dzeku.

Mahlaule u gimetile hi ku vula leswaku Chodo wa nghenela eka ti festivhali to hambana-hambana laha loko va n’wi lava va nga n’wi rhamba ku ta nyanyula ntshungu eka mitlangu na mikhuvo ya vona naswona wa khensa kuva u kale a rhambiwa eka festivhali leyikulu yi nga kala yi va kona eGiyani ya Makhadzi, leswi a vulaka leswaku swi komba ku kula eka vunanga bya Chodo.