Xikolo Xi Hahluka

HI MKATEKO NDLOVU

Vatswari va vana lava vanghenaka exikolweni xa le hansi xa Mahlohlwani, a va dyile makala yo hisa, laha va vilerisiwaka hi ku hlakala ka xikolo lexi. Vatswari va kombisa leswaku swi na ku hundza Ntsevu wa malembe xikolo xa ka Mahlohlwani xi hlakarile, laha va kombisaka leswaka xikolo xi hahlukile lwangu lambe leri nga hundza. Mhaka leyi va yi mangarile eka Ndzawulo ya Dzondzo kambe a ku va nga ni nhlanga leyi balekeke ngati.

Va kombisa leswaku ndzawulo ya dyondzo yi tsan’wa vuhlayiseki bya vadyondzi hikuva va dyondzela eka titlilasi to pfumala lwangu. Hi minkarhi ya tipfula vadyondzi a va yi exikolweni hikuva loko va ri endzeni ka titlilasi mpfula ya nghena.

Hi siku ra ti 08 Dzivamusoko 2025, vadyondzi va xikolo a va nga ya nga exikoweni, ni va dyondzisi a va kotanga ku nghena exikolweni hikokwalaho ka kuva vatswari a va dyile Makala yo hisa. Vadyondzisi va tsutsumerile eka ndzawulo ya dzondzo va ya mangala leswaku a va koti ku nghena exikolweni hikuva vatswari va pfarile xikolo.

Loko swahetano vatswari va vana va xikolo hi ku tirhisana na maphorisa ya muganga na mukhaselara a va simekile mapfhumba ya ku toyatoya va kongoma eka tihofisi ta ndzawulo ya dyondzo eSaselamani laha a va koxa nhlamulo ya xihatla mayelana na ku akiwa ka xikolo xintshwa.

Loko va ri ka rhi va toyatoya vatswari va khiyerile vadyondzisi, swirho swa huvo ya xikolo, nhloko ya xikolo na vatirhi va ndzawulo ya dyondzo va kombisa leswaku loko va nga va hlamuli hi xihatla a va nga humi etihofisini va ya emakaya. Laha va nga kombisa leswaku vakombela ndzawulo ya dyondzo yi aka xikolo ku nga se hela tin’hweti ta  ntsevu hikuva i khale va mangarile swiphiqho swa vona mayelana na xikolo.

Van’wana vatswari va nyikile matitwelo ya vona eka mhaka leyi ‘’Lexi xi hi vilerisaka hi leswaku vana va hina va dyondzela eka xikolo xo hlakala, loko ku ri na mpfula va tsandzeka ku ya exikolweni naswona loko mpfula yi va kuma va ri exikolweni va vuya tibuku ti tsakamile leswi swi endlaka leswaku hi tshamela ro xava tibuku. Hi kombela tikamara ta nkarhinyana to ndyondzela eka tona loko ku ri ka rhi ku akiwa xikolo, hi karhele ku xava tibuku n’hweti na n’hweti’’ .Manana Maluleke a hlamusela.

Maphorisa ya muganga va nyikile matitwelo ya vona. “Hi tsarile swilaveko hinkwaswo swa xikombelo xo akeriwa xikolo kambe a ku na nhlamulo. Lexi xi hi vavisaka hi leswaku loko ku ri na mpfula vana va hina a va ngheni xikolo, vuhlayiseki bya vana va hina byi le khombyeni’’ .Risimati Moris Maluleke wa hlamusela.

Hambiswiritano nhloko ya xikolo, vadyondzisi, mukhaselara ni ndzawulo ya dyondzo va khomile nhlengetelano laha va ndzawulo ya dzondzo va nga kombisa leswaku va ta tisa tikamara ta nkarhinyana to dyondzela eka tona hi nkarhi lowu nga hetiki mbilu naswona mhaka yo lulamisa xikolo va yi tekela enhlokweni swinene.

Hi nkarhi walowo va ndzawulo ya dyondzo, nhloko ya xikolo , mukhaselara na vatswari va rhangisanile va ya eka xikolo xa phurayimari xa Mahlohlowani ku ya vona xiyimo xa xikolo, kutani endzhaku ka ku vona xiyimo xa xikolo va tiyisisile leswaku va ta tisa tikamara to dyondzela eka tona ta nkarhinyana ku kondza xikolo xi akiwa.