Vinyi va mufi va lava nhlamulo

Hi Themba Chauke

Se swi hundza n’hweti endzhaku ka loko muvabyi wa swa miehleketo Klaas Ledwaba a dlawile eka wadi ya vavabyi va swa miehleketo exibedlele xa Philadelphia eDennilton ehandle ka doroba ra Groblersdal exifundzhakulu xa Limpopo. Ku ya hi swiviko swa Health e-News, ku vuriwa leswaku Vandyangu wakwe va ha yimerile xiviko xa ximfumo xa xivangelo xa rifu.

Ku vuriwa leswaku wanuna loyi wa malembe ya 33, u baleseriwile a lova hi xin’wana xigulana hi nkarhi wa nhlaselo. Kambe vandyangu wa Ledwaba va ha yimerile mbuyelo wa swikombelo. Va Health e-News va vikile leswaku Sweswi vandyangu va tekile goza ro lava muyimeri wa swa nawu ku teka mhaka leyi na Ndzawulo ya Rihanyo ya xifundzhankulu.

Muvulvuleri wa ndyangu Seun Mogotji, loko a burisana na va Health-eNews u vurile leswaku swa tika ku khudzehela kumbe ku kuma kurhula ka miehleketo eka vandyangu. “kusukela loko Klass a dlawile hi siku ra 8 Nyenyankulu, Ndzawulo ya Rihanyo ya xifundzhankulu a yi se tshama yi ta ku ta hi tivisa hi xivangelo xa rifu ra yena.” ku vula Mogotji.

U kombisile leswaku exibedlele xa Philadelphia na maphorisa va fanele ku hlamusela mbanga ya xibalesa enhlokweni ya Klaas leyi a yi kumeke hi siku ra vumune ro amukeriwa exibedlele. “Vanhu va le migangeni ya Uitvlig na le tindhawini ta Botha hi ku angarhela va ha chavisiwile hi mhangu leyi,” wa hlamusela laha a vuleke leswaku va lava ku pfala nguvo eka mhaka leyi.

Muvulavuleri wa Ndzawulo ya Rihanyo exifundzheninkulu xa Limpopo, Neil Shikwambana u amukerile leswaku Ndzawulo a yi se kuma xiviko xa ximfumo mayelana na mhangu leyi.

“Vulavisisi bya le ndzeni eka mhaka leyi a byi se hetiseka, kambe byi ta kumeka eka mavhiki lamataka.” ku vula Shikwambana, loyi a kombiseke leswaku na vulavisisi bya maphorisa byi ya emahlweni eka va Health e-News.

Ku ya hi maphorisa, swiviko swa swikambelo swa swivangelo swa rifu swa ha yimeriwile.

Muvulavuleri wa maphorisa ya xifundzhankulu Brigadier Hlulani Mashaba u byerile va Health e-News leswaku muehleketeleriwa wa ha ri exitokisini endzhaku ka ku tivonakarisa emahlweni ka khoto ya majisitarata hi siku ra 10 Nyenyankulu 2025. “U ta tlhela a tivonakarisa nakambe emahlweni ka khoto ya majisitarata hi siku ra 22 Dzivamusoko. U amukeriwile exibedlele xa Thabamoopo ehansi ka vurindzi bya maphorisa, laha a nga le ku kamberiweni ka xiyimo xa miehleketo ” wa hlamusela.

Swiviko swi kombisa leswaku maphorisa ya vitaniwile eka mhangu leyi nga humelela n’hweti leyi hundzeke laha vavabyi lava va miehleketo a va pfaleriwile kona loko va ta fika va hlanga na mhangu leyi yo chavisa.

Ku vuriwa leswaku muehleketeleriwa u kumiwile a ri ehenhla ka wanuna loyi Moya se a wu hambanile na nyama a ri exidziveni xa ngati. Ku tlhela ku vuriwa leswaku muehleketeleriwa a-a ri ku lumeteleni ka swirho swa xihundla swa mufi. Mufi u kumekile na mbanga ya xibalesa enhlokweni na tin’wana timbanga ku katsa na ku kayivela meno.

Kasi muehleketeleriwa u vuriwa kuva na yena a ri na timbanga ta xibalesa emilengeni leswi ku vuriwaka leswaku u baleseriwile hi varindzi hi nkarhi lowu a va lawula xiyimo. Kasi un’wana wa varindzi na yena u kumekile a ri na timbanga ethangeni laha ku vuriwaka leswaku u baleseriwile hi mutirhikulori eka mhangu leyi.

“Ku kumekile swiphambati swo hlaya swa maqulu ya swibalesa eka mhangu leyi” ku hlamusela Brigadier Mashaba hi nkarhi lowu a burisana na va Health e-News n’hweti leyi hundzeke loko mhangu leyi a ya ha ku humelela.