Winners Park yi hlula

Themba Chauke

Xipano xa Winnerspark, xi hlurile xipano xa Tzaneen United hi 4-3, erivaleni ra mitlangu ra ka Xikukwani eka ntlango wo nyanyula ku tlula mikutlunya yi nharhu, naswona leswi swi tisile ku cinca eka xipano tanihi leswi matlangelo ya xona se a ya heta matimba na vaseketeri va xiviri va xipano.

Leswi swi tlhela swi katsa na ku engeteriwa ka vatlangi vantshwa, Winnerspark yi tlangile hi ku titshembha kusukela loko mpepe yi ba, laha a xi tlanga ntlango wo nyanyula kusuka endzhaku, na ku hlasela hi vatlangi va le xikarhi. Hambileswi a xi ri na ntshikelelo kusuka endzhaku, xipano xi kotile ku howisa emasunguleni, laha xi nga rhanga ku kondza va ya ekuwiseni.

Kasi xiphemu xa vumbirhi, a xi nyanyula swinene, laha swipano hinkwaswo ka swona a swi hlasela hi matimba. Xipano xa Winners Park, xi howisile bolo ya vu mbirhi ku enda 2-0, kambe xipano xa Tzaneen United xi vuya hi bolo yo sungula ku endla 2-1. Kasi ku ya emahlweni, a ku ri bana-ni-ba, hikuva loko xipano xa Winners Park xi howisa, xipano xa Tzaneen United a xi angula. Loko ntlango wu ya fika emakumu, xikoro a ku ri 4-3 ku rhanga emahlweni xipano xa Winners Park.

Loko mpepe yi ba ro hetelela, vaseketeri va xipano xa Winners Park lava a va tatile rivala va kotile ku hefemula, tanihileswi nguva ya vona a yi taleriwile hi mahlomulambilu, kambe eka ntlango lowu va berile xipano xa vona mavoko lexi xi kombiseke moya wo lwa nyimpi ehandle ko lahla thawula.

Hambileswi mbuyelo lowu a wu nga khumbhi hi ndlela yo biha eka swiyimo swa swipano leswi, hikuva swipano ha swimbirhi, se a swi ponile xihloka, kambe a swi weli eka swiyimo swo tlakusiwa.

Kasi swipano leswi swi nga le ka nxungeto wa xihloka i xipano xa Black Leopard, lexi a xi ri na 14 wa mikutlunya endzhaku ka mitlangu ya 19, naswona xi fanele ku hlula na ku tlanga ku ringana eka mitlangu leyi yi saleke. Loko xipano xa Thlothlokwe Golden Syrup xi ri na 8 wa mikutlunya endzhaku ka 19 wa mitlangu.