R446M yo Tumbuluxa Mitirho

Hi Themba Chauke

Vantshwa na vanhu lava va nga le ka xiyimo xo biha eMugangeni wa ka Matsila ehansi ka Masipala wa Collins Chabane, va vuyeriwile swinene.  Leswi swi ta endzhaku ka loko Ndzawulo ya Mitirho ni Vatirhi yi sayinile ku nyikela
tikontiraka ta ntsengo wa R446 wa timiliyoni loko Hosi Matsila a nyikerile hi 50 wa switulu swa mavhilwa swo tirhisa gezi eka vanhu lava hanyaka na vutsoniwa.

Holobyenkulu wa xifundzhankulu xa Limpopo Dokodela Phophi Ramathuba, Holobye wa ndzawulo ya Mitirho ni Vatirhi Nomakhosazana Meth, xandla xa Holobye Judith Nemafhohonizinga-Tshabalala, MEC wa Nkwama wa Timali Kgabo Mahoai na Hosi Matsila a va katekisile ntirho lowu.

Loko a nyika Mbulavulo, Holobyenkulu Ramathuba u hlohloterile vantshwa ku teka nkateko lowu hi mavoko hamambirhi leswaku va ta kota ku tholeka tanihileswi vumundzuku byi nga bya vona. “Hi le ku simekeni ka vuswikoti, ku lumeka xikongomelo na ku tiyisisa leswaku vantshwa va nga vi ndzhwalo kambe ntlawa lowu faneleke ku nyikiwa matimba.”

Holobye wa Ndzawulo ya Mitirho ni Vatirhi, Nomakhosazana Meth, u khensile Hosi Matsila eka pfhumba ra yena ro seketela vanhu lava hanyaka na vutsoniwa a tlhela a byela vantshwa leswaku pfhumba leri ra Ndzawulo a hi thendara kumbe minyikelo, kambe i pfhumba leri fambelanaka na ku veka xifundzhankulu xa Limpopo eka xiyimo xa kahle loko swi ta eka ku tumbuluxa mitirho.