Va le Kruger va Endzela N’wa-Hlengani
Hi Ndlovu Mkateko
Eka siku ra ti 12 Khotavuxika 2025, va ntanga wa swihari wa Kruger, a va tlangela siku ra ku basisiwa ka mbango emugangeni wa ka Matiyani ehandle ka doroba ra ka Malamulele mpfhuka wo hoxa ribye ku nghena entangeni wa swihari wa Kruger hi heke ya Phunda Maria. Ntirho lowu a wu endleriwile endhawini ya swa vurimi leyi tivekaka hi vito ra N’wa-Hlengani Community Project ku ri xikongomelo xa ku seketela phurojeke ya vurimi ya N’wa-Hlengani.
Ntirho lowu a wu xiximiwile hi vanhu votala kusuka eka swiyenge swo hambana- hambana leswi katsatsaka Tihosi , masipala wa Collins Chabane, SANBI, VBR, LEDET xikan’we ni vandyangu wa ka N’wa-Hlengani. Hi siku leri ku vile ni migingiriko yo hambana-hambana leyi seketelaka ntumbuluko, migingiriko leyi yi katsa ku byariwa ka swimilana, ku byariwa ka misinya xikan’we ni ku basisiwa ka mbango. Va ntanga wa swihari wa Kruger va nyikerile hi misinya ya xibaha exikolweni xa le xa hansi xa Matiyani ni le tliliniki.
Va LEDET va kombisile no dyondzisa nkoka wo basisa mbango, laha va nga tiyisisa leswaku vaaki va fanele ku papalata ku cukumeta switirhisiwa swo fana ni magume, tikhondhomu, malerhi ni swin’wana leswi swi thyakisaka mbango. Va kombisile leswaku thyaka leri vaaki va ri cukumetaka hi ndlela ya vusopfa, hi mikarhi ya tipfula
ri khukhuriwa ri ya nghena eminambyeni leswi swi nga na khombo eka vutomi bya swihari ni vanhu. Va tiyisisile leswaku vanhu va fanele ku hlayisa ntumbuluko, ku papalata ku tsema misinya laha va nga kombisa na hi khombo ro tsemelela misinya. Loko ka ha ri n’hweti ya vantshwa, va masipala wa Collins Chabane va komberile vantshwa lava tirhaka ku basisa mbango leswaku va tinyiketela swinene, va nga basisi ntsena loko va ambarile yunifomo, vafanele ku hlayisa mbango hambi va ri emakaya. Va yile emahlweni va hlamusela leswaku loko va lava leswaku ntanga ni mbango swi hlayiseka va fanele ku nyika vantshwa mitirho.
Tihosi xikan’we ni vandyangu wa ka N’wa Hlengani va kombisile ku khensa swinene nseketelo lowu va wu kumaka eka ntanga wa swihari wa Kruger, laha va nga kombisa leswaku phurojeke leyi a yi nga vuyerisi vandyangu ntsena kambe yi ta vuyerisa na muganga hinkwawo. Eka malembe lamahundzeke ntanga wa swihari wa Kruger wu nyikerile ndhawu ya N’wa Hlengani hi rihlapfu, thangi ra mati, swimilana, switirhisiwa swa sola ni swotala, laha va nga kombisa leswaku va tiyimiserile ku ya emahlweni va tirhisana ni ndyangu lowu.
