CPF YI TLHERISA MALI LEYI NGA YI THUMBHA

Hi Themba Chauke

Ku tshembheka ka mutirhi wo vholintara eka Foramu ya Vuvalangi ya Vaaki (CPF), Anifa Manganyi, ku kombisile matimba ya ku tshembheka eka vuhlayiseki bya vaaki.

Manganyi, wa malembe ya 43, wansati wo huma emugangeni wa le ka Kheyi eGiyani, u kombisile mapfalu lamanene loko a tlherisa ntsengo wa R3 000, ya mali ya maphepha, leyi siyiweke hi xihoxo eka ATM emolweni wa Masingita hi Ravuntlhanu ra ti 06 Nyenyenyani 2026.

Mhangu yi humelerile hi mikarhi ya swakudya swa ni nhlikanhi, loko un’wana wa vaaki a siyile mali eka ATM hi xihoxo. Manganyi loyi a nga ri entirhweni hi nkarhi wa kona, a nga boheki ku nghenelela, loko a vona mali, u tekile mali a yi heleketa ebangi leswaku yi ta nyikiwa n’wini wa yona.

Loko a langutisa swendlo swa yena, Manganyi u vule leswaku u leteriwile hi vumunhu lebyi a nga na byona tanihi vholintara ya CPF, leswi katsaka ku tshembheka, vutihlamuleri, xikan’we na ku tinyiketela ku tirhela vaaki. “A ndzi nge vi xiphemu xa vugevenga byihi kumbe byihi loko ndzi ri ku tirheni hi matimba na ku tinyiketela ku sirhelela na ku lemukisa vaaki,” ku vula yena.

Loko CPF yi tirha tanihi xiyenge xo seketela vaaki, hi ku tirhisana na maphorisa ya tiko ra Afrika-Dzonga, na ku kondletela ntirhisano exikarhi ka maphorisa na vaaki eka ku sivela vugevenga na nseketelo wa vatwisiwakuvava, a va kumi miholo.

Ehandle ka leswi, Manganyi u tinyiketerile kusukela malembe mantlhanu lama hundzeke ku tirha swin’we na maphorisa tanihi xirho xa CPF ku pfuna ku antswisa vukorhokeri bya vaaki emugangeni wa ka vona. Vukona bya yena bya vonakala hi mikarhi ya nxungeto wa le henhla wa vugevenga hi mahelo ya n’hweti, laha timhangu to phanga, vukanganyisi, vuxisi na vukhamba swi tlakukaka edorobeni.

Ehandle ka ku sivela vugevenga, Manganyi u na nkhinkhi wo lwisana na timhaka ta madzolonga ya rimbewu na ku dlawa ka vaxisati. U vula leswaku nyimpi yo lwisana na madzolonga ya rimbewu na swona swi lava ku nghenelela ka vaaki. “Ndzi tshembha leswaku siku rin’wana hi ta hlula eka nyimpi leyi, laha vahlekisani va lulamisaka mikwetlembetano hi kurhula, xikan’we na ku va vana va tlanga eswitaratini swo hlayiseka,” ku vula yena

Hi ku tekela enhlokweni ku tshembheka na ku tinyiketela ka Manganyi, Khomixianara wa maphorisa ya xifundzantsongo xa Mopani Mejara Jenerali Willy Mashava na Khomandara wa xitichi xa maphorisa ya Giyani, Brigadier Khutso Solomon Serakwana va n’wi rhambile ku ya etihofisini ta maphorisa ta xifundzantsongo xa Mopani eGiyani, laha a xiximiweke ximfumo tanihi un’wana wa lava tshembhekeke eka swirho swa CPF.

Ku ya hi Sejeni Maphure Manamela, kusuka eka senthara ya vuhlanganisi ya xifundzakulu, u vule leswaku u xiximiwile tanihi xirho xo hlawuleka xo tshembheka xa CPF, na swona u tlhomiwile tihlo tanihi un’wana wa lava nga ta tekeriwa enhlokweni eka masagwati ya xifundzantsongo. Khomixinara wa maphorisa ya xifundzantsongo xa Mopani Lieutenant Jenerali Thembi Hadebe u hoyozerile Manganyi, a n’wi hlamusela tanihi hi xikombiso xa ntiyiso xa matirhelo ma kahle lama lavekaka eka ku aka miganga leyi hlayisekeke.

 “Maphorisa ma ri woxe, a ma nge hluli eka vugevenga. Swi lava vaaki lava nga na ku navela ku yima va endla leswi faneleke, hambi ku nga ri na munhu loyi a va languteke. Leswi endliweke hi Manganyi swi kombisa nkoka wa ntiyiso wo tshembheka, vutihlamuleri na vukorhokeri lebyi hi byi hlohlotelaka,” ku vula Hadebe.