HOLOBYENKULU A VALANGA NDHAWU YA IKHONOMI

Hi Themba Chauke

Holobyenkulu wa xifundzakulu xa Limpopo, Dok Phophi Ramathuba, hi siku a nga edzela MMSEZ u tekile rendzo ra nseketelo xikan’we no kambela ndhawu ya Ikhonomi yo Hlawuleka ya Musina-Makhado, leyi tivekaka tanihi ‘Musina-Makhado Special Economic Zone (MMSEZ)’ enkambeni ya Tadani ehansi ka masipala wa Musina, exifundzenintsongo xa Vhembe.

Holobyenkulu, a heleketiwile hi MEC wa Ndzawulo ya Nhluvukiso wa Ikhonomi, Mbango na Vupfhumba, lava a va rhangerile vurhumiwa ku amukela xiviko xa ntirho lowu endliweke eka nhluvukiso lowu endliwaka wa MMSEZ. Rendzo leri i xiphemu xa mfumo wa xifundzakulu wo tinyiketela eka ku ndlandlamuxa ikhonomi na nhluvukiso wa xifundzakulu.

Vurhumiwa a byi katsa Dok Khathutshelo Ramukumba, Mutshamaxitulu wa bodo ya MMSEZ; swirho swa bodo ya MMSEZ; Nhloko ya Ndzawulo ya LEDET, Dok Matodzi Ramathumbu; Mufambisinkulu wa Ajensi ya Nhluvukiso wa Ikonomi ya Limpopo (LEDA), Jason Ngobeni; xikan’we na Mufambisinkulu wa MMSEZ, Gundo Maswime.

MMSEZ i xiyenge xa mfumo wa xifundzakulu lexi tumbuluxiweke ku veka xiyimo xa xifundzakulu tanihi ndhawu yo hlawuleka ya vuvekisi, hi ku tlakusa ku kula ka ikhonomi leyi katsaka swiyenge swo hambana-hambana ku tinghenelerisa. Loko a vulavula na vurhumiwa, Holobyenkulu Ramathuba, u tekerile enhlokweni ntirho lowu endliweke endzhaku ka ku cinca ka mafambiselo ya xiyenge lexi.

 “Ku vile na ku cinca nyana endzeni ka bodo, na swona sweswi hi sungula ku vona migingiriko. Mufambisinkulu u thoriwile na swona u le ku tirheni hi matimba ku endla leswaku migingiriko yi famba hi ndlela,” ku vula yena.

Xikongomelo xa rendzo i ku kambela ntirho lowu endliweke kusukela loko ku endliwile swikambelo nkarhi lowu hundzeke, ngopfungopfu endzhaku ka ku cinca loku veke kona, ku katsa na swivilelo hi mhaka ya mbango. Ku landzela nhlengeletano wo koma enkambeni ya Tadani, Holobyenkulu na vurhumiwa byakwe va valangile nkamba ya Tainama, laha a gimeteke rendzo rakwe ra nseketelo.

Holobyenkulu u tlhele a nyika xiviko xa mbuyelo wa rendzo rakwe eka swiyenge leswi khumbhekaka xikan’we na vaaki, laha a tiyisiseke ku tinyiketela ka mfumo eka ku tiyisisa leswaku MMSEZ yi hoxa xiave lexi twalaka eka nhluvukiso wa ikhonomi eLimpopo.