N’WATIKHEMISI A GWEVIWA 10 WA MALEMBE

Hi Themba Chauke

N’watikhemisi wa xinuna wa malembe ya 41, Tinyiko Gift Mangolele, kusuka eka Malamulele u gweviwile malembe ma khume ekhotsweni kumbe ku hakela ndziho wa R500 000, endzhaku ka xigwevo ehenhla ka milandzu ya 18 ya vuxisi hi Khoto ya Vugevenga bya Mabindzu ya Giyani.

Mangolele, loyi ku nga mufambisinkulu wa khemisi eka Malamulele u khomiwile endzhaku ka vulavisisi byo enta bya swikoxo swa vuxisi swa vutshunguri leswi endliweke exikarhi ka Sunguti na Ndzhati 2018. Leswi swi endlile leswaku xikimu xa mfumo lexi tivekaka hi GEMS, xi lahlekeriwa hi R91 873, 07 eka tin’hweti ta nkaye.

Vuxisi lebyi byi kumiwile endzhaku ka loko GEMS yi lemukile swikoxo leswi kanakanisaka leswi rhumeriweke hi ku yimela swirho swa vona. Mhaka leyi yi mangariwile emaphoriseni, laha nandzu wa vuxisi wu pfuriweke wu lavisisiwa hi Warranter Officer Choene Manaka, kusuka eka xiyenge xa vugevenga bya mabindzu bya xifundzakulu ku yisa emahlweni vulavisisi.

Vumbhoni lebyi kombisiweke ekhoto, byi paluxile leswaku Mangolele u tihlanganisile na swirho swa GEMS a kombela vuxokoxoko bya vona, a va tshembhisa tihakelo kumbe titanghu. Kusuka kona u tirhisile vuxokoxoko bya vona ku endla swikoxo swa vuxisi ehandle ka vutivi bya vona.

U tirhisile vuxokoxoko bya madokodela mambirhi ehandle ka mpfumelelo wa vona ku rhumela swikoxo swa mimirhi leyi lavaka swileriso swa madokodela. Eka tin’wana timhangu, swirho a swi nga endzelanga madokodela lama tirhisiweke na swona a va nga tivi nchumu hi swikoxo leswi endliwaka hi mavito ma vona.

Endzhaku ka vulavisisi byo leha lebyi tekeke malembe ya nkombo, Mangolele u khomiwile hi ti 12 ta Mudyaxihi lembe leri hundzeke. U tivonakarisile emahlweni ka khoto ya majisitarata wa ka Malamulele hi siku leri fanaka laha a nyikiweke beyili ya R5 000.

A ri ehandle hi beyili ku kondza ku tengiwa nandzu wakwe, laha a nga voniwa nandzu eka milandzu hinkwayo ya 18 ya vuxisi hi Khoto ya Vugevenga bya Mabindzu ya Giyani. Hi nkarhi wa ntshamo wa xigwevo, muchuchisinkulu wa mfumo Advocate Martin Molokwane u vule leswaku milandzu leyi ya chavisa, leyi kombiseke mavunwa ya rihlaza, na swona ku laveka xigwevo xa le henhla.

Molokwane u bumabumerile leswaku xigwevo lexi faneleke eka nandzu lowu i 10 wa malembe, a tlhela a vula leswaku ndziho a wu fanelanga ku va ehansi ka ntsengo wa R1 wa timiliyoni. Khoto yi vuye yi gweva Mangolele 10 wa melembe ekhotsweni, kumbe ku hakela ndziho wa R500 000.

Mufambisinkulu wa Huvo ya Vuchuchisi eLimpopo, Advocate Ivy Thenga, u amukerile xigwevo a vula leswaku vaaki va langutela xigwevo xa muxaka lowu xikan’we na magoza yo karhi ehenhla ka vuxisi na vukungundzwani ku vuyisela ntshembho eka voko ra nawu.

U tshikelerile a vula leswaku ku tinyiketela loku yaka emahlweni ka voko ra nawu na ku teka vutihlamuleri swi na nkoka ku tiyisisa vumbiwa ra xidimokirasi eAfrika-Dzonga, laha a nga tlhela a hoyozela Advocate Molokwane na swiyenge hinkwaswo leswi hoxeke xandla ku fikelela xigwevo lexi.