SWA KANAKANISA SWA TIDYONDZO ETUT

Hi Themba Chauke

Loko tiyunivhesiti tin’wana etikweni ti sungurile na tidyondzo ta tona ta lembe leri, vatswari lava navelaka ku tsarisela vana va vona eka rhavi ra Yunivhesiti ya Thekinoloji ya Tshwane (TUT) eGiyani, eka lembedyondzo ra 2026, va ha ri exinyamini, tanihileswi yunivhesiti yi nga nyikiki vuxokoxoko byo hetiseka byo lulamela ka yunivhesiti.

Hambileswi yunivhesiti yi humeseke xitatimende eka webusayiti ya yona lexi kombisaka leswaku yi lulamerile ku amukela swichudeni eka rhavi ra le Giyani leri ra ha ku akiwaka hi vuntshwa, eka lembedyondzo ra 2026. Yunivhesiti a yi se nyika tihlamulo eka swivutiso leswi fambelanaka na timhaka ta migingiriko ya vumaki leti yaka emahlweni, laha ku lavaka ku tiviwa hi ku lulamela ka titlilasi na byetelelo bya swichudeni.

Loko a vutisiwa ku basisa swiviko swa leswaku swin’wana swichudeni swa TUT swi dyondzela eKholichi ya Letaba eGiyani, Nhloko ya Vuhlangaisi eTUT, Phaphama Tshisikwame, a nga nyikanga nhlamulo yo kongoma, kambe a vula leswaku vuxokoxoko bya kumeka eka webusayiti ya yunivhesiti.

“A ndza ha yimerile n’wangulo, kambe vuxokoxoko byo hlaya lebyi mi byi lavaka byi nga kumeka eka webusayiti ya yunivhesiti. Ndzi ta mi rhumela linki ya kona,” ku vula yena, loko a vutisiwa hi ku hlwela ka n’wangulo kusuka eka swiyenge swa mahungu. Hambiswiritano, linki leyi tshembhisiweke a yi rhumeriwanga, na swona webusayiti yo va na xitatimende xin’we ntsena hi rhavi ra Giyani, lexi nga hlamuriki swivutiso leswi vutisiweke.

Ku ya hi xitatimende lexi kandziyisiweke eka webusayiti ya yunivhesiti, ku ta leteriwa tidyondzo ta ti diploma ta ntlhanhu eka rhavi ra le Giyani leti katsaka Accounting, Building Science, Entrepreneurship, Horticulture and Public Affairs, ku katsa na Bachelor of Education Honors in General Education and Training.

Xitatimende xi tlhela xi kombisa leswaku ku kambela swikombelo swi le kusuhi no fika emakumu, laha kwalomu ka 76% wa swichudeni swi amukeriweke eka tidyondzo ta ti diploma ta lembedyondzo ra 2026. Xi tlhela xi kombisa leswaku khalendara ya tidyondzo ta le ka rhavi ra le Giyani yi ta humesiwa ku nga ri khale, na swona swichudeni leswi amukeriweke swi ta kuma switiviso mayelana na khalendara ya dyondzo.

Loko ku ri timhaka ta migingiriko leyi yaka emahlweni yo antswisa titlilasi, leyi sunguleke hi Ndzhati lembe leri hundzeke, yunivhesiti yi vula leswaku ku tirhiwile swinene na swona kule hi le ndzhaku. Ku tlhela ku vuriwa leswaku Huvo ya Tidyondzo ta le Henhla, yi ta endzela rhavi leri ku kambela ku lulamela ka rona. “Loko hi nyikile xileriso, titlilasi ti ta sungula ehandle ko dya nkarhi,” ku hlamusela xitatimende.

Yunivhesiti yi tlhele yi tiyisisa leswaku swichudeni leswi se swi amukeriweke eGiyani, a swi nge tsoniwi ku nyikiwa tidyondzo leti faneleke leti va ti tsakelaka leti enkarhini wa sweswi a ti nga se kumeka. Ku vuriwa leswaku swichudeni swi ta tivisiwa hi tindlela leti nga tekiwaka eka mhaka leyi.

 “Tanihi yunivhesiti ya thekinoloji, hi tirhisa tindlela to hlaya to phakela dyondzo. TUT yi tiyisisa leswaku swichudeni hinkwaswo leswi amukeriweke eyunivhesiti a swi nge tsoniwi dyondzo. Loko swivandla swi pfuleka eka tidyondzo leti va endleke swikombelo swa tona, vuxokoxoko byi ta tivisiwa eka webusayiti ya yunivhesiti, na swona swichudeni swi ta tivisiwa hi mapapila kusuka eka Hofisi ya Mutsarisi.”