RENDZO RA NSEKIEY MANGANYI

Hi Pilot Manganyi

Emugangeni waka Bungeni laha timbila ta Xitsonga ti kuriseke rixaka ra vatsonga, nqambhi ya malembe ya le hansi yi sungula ku tivonakarisa hi timbila leti fanaka. Nseketelo Bianca Manganyi loyi a tivekaka hi vito ra Nsekiey Manganyi eka vunanga bya Xitsonga, i nqambhi leyi ndlandlamukaka yi nghena exigazeni hi ku titshembha laha a nga qambha nghoma leyi thyiweke “Ka Manganyi”. Marimba ya nghoma leyi ya chayiwile hi Savisto, na swona ya kumeka hambi kuri ka Youtube na leka Spotify. Hambiswiritano, ntlhontlho wa ku nghenelela ka Nsekiey exigazeni a wu sungulanga namuntlha, wu sungurile tanihi ndzilo lowu a wu yimerile ku hlanganyetiwa.

Eku kuleni ka yena, a ri munhu loyi a rhandzaka vunanga bya Xitsonga. Loko ku ri emitlangwini, na le ka mikhuvo a ku tlangiwa tinghoma leti kuriseke Nsekiey. Ehenhla ka tinghoma ta tiqambhi leti a ti tlangiwa evukonweni bya Nsekiey, Benny Mayengani ku vile nqambhi leyi Nsekiey a nga tikuma a ri karhi a rhandza tinghoma ta yona. Vukona bya tinghoma ta Mayengani byi vurile swo tala eku kuleni ka Nsekiey. Loko a vutisiwa hi nhlohlotelo wa yena wa ku qambha tinghoma, u boxile leswaku: “rin’wana ra masiku, makwenu wa mina u endlile nkandziyiso wa mina ndzi ri karhi ndzi yimbelela risimu ra Mayengani (Everything I do), kutani a n’wi rhumela na swona Mayengani u kombisile ku tsaka swinene”. Xiphemu lexi ku vile xona xi nga tisa ku cinca eka nhlohlotelo wa vunqambhi bya Nsekiey.

Nsekiey u yile emahlweni a boxa leswaku u sungurile ku yimbelela hi lembe ra 2019, “ndzi sungurile ku yimbelela hi lembe ra 2019 hikuva a ndzi navela ku fana na Benny Mayengani, tanihileswi a ndzi rhandza na tinghoma ta yena”. Nhlohlotelo wa Mayengani wu kondleterile leswaku a kota ku vona nyiko ya yena laha a nga sungula ku qambha ta yena tinghoma. Ehandle ka Mayengani, u kombisile leswaku yin’wana ya tiqambhi leti ti n’wi hlohlotelaka i Metrobeatz. “Yin’wana ya tiqambhi leti ndzi hlohlotelaka i Metrobeatz” ku boxa Manganyi.

Ehenhla ka sweswo, Nsekiey u kombisa leswaku a nga tsaka ngopfu loko o tikuma a tirhisanile na Benny Mayengani kumbe Metrobeatz eka tin’wana ta tinghoma. “Ndzi nga tsaka ngopfu loko un’wana wa vona (Mayengani/Metrobeatz) o tirhisana na mina ku yimbelela tinghoma. Milorho ya Nsekiey a yi heleli kwalaho, u na ku navela leswaku ingi a nga famba matiko a ri karhi a kombisa vutshila bya yena, na ku vona ntshungu wu cina hi tinghoma ta yena. “Mina ndzo lava ku famba matiko yo hambana-hambana ndzi ri karhi ndzi kurisa ndzhavuko wa mina, na ku vona vanhu va ri karhi va cina hi tinghoma ta mina”, ku boxa Manganyi.

Hambiswiritano, ku na swirhalanganyi endleleni ya vunanga bya Nsekiey. U boxa leswaku enkarhini wa sweswi a ku na munhu loyi a nga n’wi chayelaka kumbe loyi a nga kandziyisaka kona tinghoma ta yena. “Enkarhini wa sweswi a ndzi nge swikoti ku humesa tinghoma hikuva munhu loyi a ndzi kandziyisa eka yena se u tshama exilungwini, kambe tinghoma ndzi na tona ndzi tsarile,” ku boxa Nsekiey. U languterile ku yisa nyiko ya yena emahlweni tanihileswi a languteleke ku lunghisa xiphiqo lexi a langutaneke na xona hi ndlela leyi faneleke.