RENDZO RA RODWELL MABASA

Hi Pilot Manganyi

Jaha leri tivekaka hi vito ra Rodwell Mabasa, kusuka eNtlhaveni Block C, ehandlenyana ka doroba ra ka Malamulele ri boxeketa eka nyiko ya rona ya bolo ya milenge. Jaha leri ri xiximiwile no beriwa mandla hikokwalaho ka matlangelo ya rona ya xiyimo xa le henhla.

Mabasa u vile xiphemu xa mphikizano wa Mazhaka Foundation lowu a wu khomeriwile eNtlhaveni Block H, hi n’hweti ya N’wendzamhala 2025. Mabasa u kombisile vurhangeri, vuswikoti na ntokoto tanihi mukapiteni wa xipano xa yena. Matlangelo ya yena ya endlile leswaku vanhu va n’wi thya vito ra ‘TLB’. Vito ra TLB ri ta ri huma eka khale ka mutlangi wa xipano xa Orlando Pirates, loyi a tivekaka hi vito ra Mbekezeli Mbokazi. Mabasa u nyikiwile vito leri hikuva loko vanhu va konanisa matlangelo ya yena a va vona ya yelana na ya Mbokazi.

Mabasa i mutlangi loyi a tlangela xipano xa Mazhaka hi nkarhi wa mphikizano wa Mazhaka Foundation. U tlangile xiphemu lexikulu hi ku sivela vatlangi va swipano leswin’wana ku howisela xipano xa yena tanihileswi a tlangaka tanihi mutlangi wa le ndzhaku. Xipano xa yena xi tlangile ku kondza xi ya fika emahetelelweni laha xi nga hluriwa hi xipano xa Magona FC enkumeni. Xipano xa Mazhaka xi khomile xiyimo xa vumbirhi ehenhla ka swipano swa khume-tsevu. Vaseketeri va pfumela leswaku vukona bya TLB byi tlangile xiave lexikulu swinene eka mbuyelo wa xipano xa Mazhaka. Mabasae u tlangile mitlangu hinkwayo ya mphikizano a nga kumanga na karata na rin’we kusuka eka n’watipepe.

Vurhangeri bya mphikizano byi bumabumerile xivono na nyiko ya Mabasa endzeni ka rivala. Byi boxile leswaku u endlile xikombiso tanihi mutlangi loyi a nga tlanga hi xiyimo xa le henhla loko a hlanganile na swipano leswi tikaka hi nkarhi wa mphikizano. “Mabasa u endlile xikombiso tanihi mutlangi wa xiyimo xa le henhla, leswi swi kombisa ku tiyimisela, vuswikoti na ntokoto”, ku boxa vurhangeri. Endzhaku ka mphikizano, Mabasa u xiximiwile hi xidlodlo na ntsengo lowu ringanaka R1 500. Vaseketeri va boxile leswaku va na ku pfumela leswaku matlangelo ya TLB ya vile na nhlohlotelo eka vatlangi van’wana, xikan’we na vahlaleri va mphikizano.

Hi nkarhi wa mphikizano, ku vile na vukona bya vanhu lava xopaxopaka tinyiko ta vatlangi leswaku va ta va teka va ya tlangela swipano swa le henhla. Mabasa ku vile yena a ri yexe loyi a nga hlawuriwa ku ya kombisa vuswikoti bya yena eka xipano xa Lerumo Lions, lexi tlangaka eka mphikizano wa National First Division. Ku tinyiketela na vuswikoti bya yena swi n’wi vuyerisile hikuva endzhaku ka sweswo u vile a tlakusiwa a sayina kondiraka ka Lerumo Lions leyi tlangaka eka ligi ya ABC Motsepe. Vaseketeri va yena va kombisile ku tsaka eka swiyenge swa mabulo swo tanihi ‘Facebook’, laha va nga boxa leswaku swi fanerile leswaku a kumeka eka xiyimo lexi a nga eka xona. Va tlherile va boxa leswaku va ha languterile swo tala kusuka eka Mabasa.