GIYANI SAFA YI PFUXA LIGI YA VANTSHWA

Hi Themba Chauke

Nhlangano wa Bolo ya milenge eGiyani lowu tivekaka hi Greater Giyani Football Association (LFA) yi lava ku pfuxeta ligi ya vantswa, ku vuyisela mphikizano wa bolo ya milenge eka vatlangi va vantshwa endzhaku ka malembe mambirhi wu nga ri kona hikwalaho ka swiphiqo swa timali. Ligi leyi languteriweke ku famba kusukela hi siku ra 01 Mudyaxihi ku fika 03 Mudyaxihi 2026, a yi yimile hikokwalaho ko pfumala vaseketeri va swa timali, leswi siyeke vatlangi va mundzuku va ri hava ndhawu yo kombisa vuswikoti bya vona. Hambiswiritano, ku vuya ka vaseketeri va swa timali hi va Nkulungwani Consultants swi tisile vutomi byintshwa eka pfhumba leri.

Nhloko ya Nhluvukiso wa Bolo ya Milenge ya Vantshwa eGiyani LFA, Gezani Mashaba, u tiyisisile mhaka leyi a kombisa ntshembho eka ku vuyela ka ligi leyi. “Hi tsakile ku tivisa leswaku Nkulungwani Consultants, lava tshameke va hi seketela hi lembe ra 2023 va vuyile ku seketela ligi leyi nakambe,” ku vula Mashaba.

U kombisile leswaku Ligi yi tikeriwile ku va kona eka malembe lama hundzeke, tanihileswi vatlangi vo hlaya va tsandzekaka ku fikelela swilaveko swa tihakelo. “Vatlangi vo hlaya va pfumala mali yo titsarisela. Hambiswiritano, enkarhini wa sweswi, vaseketeri va swa timali va tinyiketerile ku hakelela nhlayo ya le henhla yo titsarisela, ku endla leswaku ku nghenelela swi fikeleleka,” ku vula yena.

“Enkarhini lowu hundzeke, swipano a swi fanele ku hakela R1 800 eka swipano swa malembe ma 13, 15 na 17, kambe sweswi, vatlangi va ta hakela ntsena R150 ya vufambisi etihofisini ta hina ta SAFA. Tihakelo leti ti ta tirhisiwa ku hakela munhu loyi a nga na vutihlamuleri byo nyika makarata ma ka SAFA,” wa hlamusela.

Mashaba u vule leswaku vaseketeri va swa timali va tinyikerile ku hakelela vatlangi va 20 hi ntlawa wa xipano ku ya hi malembe ma kona, leswi vulaka leswaku 20 eka malembe ma 13, 15 na 17. “Hi ku angarhela xipano xin’wana na xin’wana xi ta va na vatlangi va 60 lava nga ta tsarisiwa ehandle ka tihakelo,” u ya emahlweni, laha a nga vula leswaku swipano swi ta kota ku tirhisa mali ya swona ku hakelela swin’wana swilaveko swo fana na jesi ya swipano ku nga swilaveko eka swipano leswi tlangaka eka tiligi ta ka SAFA.

Mashaba u tlhele a tshikelela nkoka wa ku nghenelela eka swiyenge swa SAFA, hi ku kombisa mikateko leyi tumbulukaka eka vatlangi lavantsongo. “Vatlangi va kula kahle endzeni ka tisisitimu ta ka SAFA, laha va vonakalaka eka mikateko yo valangiwa hi swipano leswikulu swa le tikweni. Swi na nkoka ku tiva leswaku mutlangi a nge ngheneleli eka mitlangu yo hlawuriwa ka vatlangi ya ka SAFA ehandle ka karata ra ka SAFA, leri va nga ri kumaka ntsena hi ku tlanga eka migingiriko ya ka SAFA,” wa hlamusela.

Endzhaku ka ntlangu wa bolo ya milenge, Mashaba u tiyisisile leswaku leswi swi tlhela swi hundzuka dyondzo leyi vatlangi va yi kumaka hi ku tlanga ehansi ka swiyenge swa ka SAFA, a vula leswaku swi pfuna vatlangi lavantsongo ku tiva milawu ya ntlangu, tanihileswi va leteriwaka hi milawu ya ximfumo kusuka va ha ri lavantsongo ku kondza va kula. “Va dyondza vun’we bya xipano, matikhomelo ma kahle, ku amukelana na ku hloniphana xikan’we na nhlonipho eka vadzaberi na vafambisi,” ku vula yena.

Loko a gimeta, u vule leswaku Ligi leyi ya Vantshwa yi languteriwa ku tlanga xiave lexikulu eka ku hluvukisa bolo ya milenge kusuka ehansi eGiyani, hi ku nyika vatlangi lavantsongo swiyenge na nseketelo ku yisa emahlweni na ku navela ka vona eka timhaka ta mitlangu.