Singita a kuma nseketelo

Pilot Manganyi

Singita Manganye wa malembe ya 24 ku suka edorobeni raka Malamulele u kumile nseketelo wa bazari leswsku a kota ku fikelerisa emakumu tidyondzo ta yena ta vudokodela. Singita Manganye ule kusuhi naku humelerisa norho wa yena wakuva dokodela leswaku atava dokodela ximfumo endzhaku ka loko a kumile nseketelo wa bazari ku suka eka Bonitas Medical Fund leyi yi tirhisanaka na Gift of the Givers.

Bazari leyi yi nyikeriwile eka mudyondzi loyi a endla lembe ro hetelela Wits University. Manganye I n’wana loyi a nga kulela edorobeni raka Malamulele, laha a nga endla todyondzo tayena tale henhla exikolweni xale kusuhi xa EPP Mhinga Secondary. U kurisiwile endyangwini lowu wu tiyisisaka nkoka wa dyondzo, tanihiloko nasweswi a hlongorisaka norho wa yena wakuva dokodela endzhaku ka malembe lamo tala maku tiyimisela naku tirha hi matimba.

Manganye u kulerile endyangwini wa vanhu va nkombo, laha eku kuleni ka yena anga vona nkoka waku tikhoma kahle naku tiyimisela. Loko Manana wa yena a nga seva mudyondzisi, a hanyisa ndyangu wakwe hiku xavisa swibyaliwa swo tanihi miroho, laha tatana wa yena a tirha tanihi mudyondzisi kambe sweswi u humile pexeni. U vile na nhlohlotelo loko a vona vatswari va yena vari vadyondzisi laha anga suka eka digiri ya Bachelor of Health Sciences a ya endla digiri ya Bachelor of Medicine and Surgery.

Makungu ya nseketelo wa bazari ya Bonitas na Gift of the Givers iku seketela swichudeni leswi swi dyondzelaka kuha vaongori, loko vari karhi va pfuneta naku ndlandlamuxa matirhelo ya vuongori bya Afrika-Dzonga tanihileswi tiko ringa langusana na swirhalanganyi swa muxaka lowu.

Bazari leyi yi tile hi nkarhi wa nkoka eka tidyondzo tayena tanihileswi a languteleke ku hetisa tidyondzo takwe ta vudokodela.
“Nseketelo wa bazari leyi wu vula swo tala ngopfu eka mina. Swindzi tekerile nkarhi ku fika laha ndzi nga kona, kambe sweswi kuna nhlanga leyi balekaka ngati. Bazari leyi I vukekisi, kungari hi tlhelo ra tidyondzo ntsena, kambe eka vumundzuku lebyinene bya vuongori. Yita endla leswaku macheleni yanga ndzi tsandzisi ku fikelela norho wa mina”, ku boxa Manganye.

Ntlhontlho wa yena wa vuongori wu sungurile eka malembe yale hansi ya nkaye (9), naswona u hlohloteriwile hi dokodela leri a ngari endzela eka malembe yale hansi.

“Nkarhi ni nkarhi loko ndzi endzela dokodela a ta ndzi nyika swiwitsi. Tintswalo leti ti tshamile na mina, ndzi sungurile kuti vona tanihi dokodela, kungari vudokodela ntsena kambe munhu loyi a tisaka nseketelo eka vanhu”, ku boxa Manganye.

Una ku tshembha leswaku utava dokodela leri tshungulaka vana, leswi swi hlohloteliwaka hikuva a ri na mhaka na vana lava tikeliwaka, naku tisa ku cinca eka vana lavantsongo.

Ehendle ka kuva na norho wa kuva dokodela, una ku navela leswaku inge siku rin’wana a nga nyikela eka muganga waka vona, ngopfu ngopfu hi tlhelo at tidyondzo ta rihanyo ra vana xisati tanihi nsivelo wa vuyimani eka vana lavantsongo. U languterile ku dyondzisa hi tlhelo ra swivangelo swa switandzhaku swa swidzidziharisi eka vana lavantsongo.

“Ndzi lava ku tirhisa vutivi bya mina ku ndlandlamuxa rihanyo naku pfuna vana lavantsongo ku teka swiboho leswinene hi mayelana na rihanyo na mahlayisekelo ya vona”, ku gimeta Manganye.