MUNTSHWA A KOMBISA VUTOMI BYA LE MUGANGENI

Hi Mapula Glashy Makoto

Khanimamba Chabalala wa malembe ya makume mbirhi-mbirhi (22) wo huma emugangeni wa le Blinkwater kusuhi na le Giyani eLimpopo, i xichudeni xa LLB eYunivhesiti ya Venda naswona i musunguri wa khamphani ya vuhumelerisi bya tifilimi ya Makovongo Film Productions.

Hi ti 09 Ndzhati 2026 u humesile filimi leyi thyiweke “Deep Down the Villages”. Khanimamba u tsarile, a fambisa a tlhela a tlanga eka filimi leyi ku kombisa vuswikoti bya yena na vatlangi va yena.

Filimi leyi yi vulavula hi nhwanyana wa malembe ya kondlo-a-ndzi-dyi loyi a rhumeriwaka kuya exikolweni kambe ematshan’weni ya sweswo u tirhisile mali yakwe yo ya exikolweni a dya na jaha rakwe.

Filimi leyi yi tsundzuxa vantshwa hi switandzhaku swo hlawula timhaka ta marhandzu ku tlula dyondzo ni makhombo ya vugevenga ni ntshikelelo lowu nga landzelaka swiboho swo biha. Khanimamba na makwavo wa yena Enelani Chabalala va seketele vuhumelerisi bya filimi leyi hi ku tirhisa timali kusuka enkwameni wa vona, va tirhise kwalomu ka mali yo ringana R3 000–R3 500 eka swakudya, switirhisiwa leswi a swi laveka (ku fana na swibamu swo tlangisa na ku tixongisa), swo famba hiswona na ku hakela ndhawu leyi ava tekela filimi eka yona ya ndhawu ya vuhungaselo ya Gwegwes. Va tirhisile ntsena riqingho ra iPhone ku hlela filimi ya vona.

Chabalala u dyondze ku tlanga na ku endla tifilimi hi ku hlalela tivhidiyo eka YouTube a tlhela a tinyika nkarhi a dyondza eka vaendli va tifilimi lava nga na ntokoto. Khanimamba u vula leswaku ku navela swilo leswinene hi swona swi n’wi endleka leswaku a rhandza ntirho wa yena.

Xin’wana xa swiphiqo swa yena leswikulu i ku pfumaleka ka mali na switirhisiwa swa xiphurofexinali. U tshemba ku kuma vaseketeri kumbe vatirhisani lava nga n’wi nyikaka tikhamera, tivoni na switirhisiwa swin’wana leswaku xipano xa yena xi ta antswisa ntikelo na ku fikelela eka thelevhixini ya rixaka.

Khanimamba u kunguhata ku teka filimi ya “Deep Down the Villages” rhengu ra vumbirhi hi N’wendzhamhala 2026. U kongomisa ku humesa filimi leyi eka xitichi xa yena xa YouTube hi Sunguti 2027 na ku tumbuluxa swivandla swo tala eka vatlangi va laha kaya na vaendli va tifilimi.