Ndzawulo yi Nsimeka Mapfhumba ya Vuhandzuri

HI Mkateko Ndlovu

Ndzawulo ya rihanyo exifundzeninkulu xa Limpopo a yi simekile mapfhumba yo endzela
swibedlele swo hambana-hambana laha a va langutana na ku endla vuhandzuri bya vuvabyi
byo hambana-hambana. Vuvabyi lebyi byi katsa vuhandzuri bya marhambu, vuhandzuri bya
mahlo, vuhandzuri eka vana, vuhandzuri bya pulasitiki na vuhandzuri bya xikandza.

Mapfumbha lawa a ya humelela eka swibedlhela swo hambana-hambana exifundzheninkulu xa
Limpopo ku katsa na xibedlela xa Tshilidzini, Elim,Siloam, Donald Fraster na xibedlela xa
Malamulele. Ndzawulo yi gimetile pfhumba ra yona eka timhaka to endla vuhandzuri no tiyisisa
rihanyo ra le makaya exifundzenintsongo xa Vhembe . Mapfhumba lawa ya kongomisiwa eka ku
hunguta ku salela endzhaku ka vuvabyi bya ku pfimba mahlo hi ku tirhisana na vuhandzuri bya
Bulamahlo.

Byin’wana vuhandzuri lebyi endliweke byi katsa vuhandzuri eka swigulana leswi nga na
swiphiqho swa mahlo exibedlhela xa Elim, leswi swi landzela endzhaku ka loko ku simekiwile
mapfumba ya vuhandzuri bya mahlo exibedlele xa Thabazimbi laha mapfhumba lawa ya nga
famba kahle. Kwalomu ka 230 wa swigulani swi endliwile vuhandzurie exibedlele xa Elim.

Xifundzhakulu xi tinyiketerile ku yisa emahlweni no tirha hi matimba eka mapfhumba lawa.
Ku languteriwa leswaku ku ta va na madokodela lawa ya tokoteke eka vutshunguri bya mahlo.
Vuhandzuri bya sweswi bya ku pfimba ka mahlo byi salerile endzhaku eka xifundzhankulu. Ku
vuriwa leswaku ku na kwalomu ka 10 000 wa vavabyi lava languteleke ku ku kuma vutshunguri
bya mahlo.

Xipano xa xibedlele xa Elim xi tirha hi matimba ku tiyisisa leswaku vavabyi va kuma
vukorhokeri lebyi va faneleke. Xikongomelonkulu xa mapfumba lawa i ku lava hunguta nhlayo
ya vanhu lava ku nga khale va vekiwile eka tilayini to rindzela vuhandzuri bya mahlo. Ndzawulo
yi vula leswaku yi khensa swinene eka va ntokoto wa swa rihanyo kuva va tinyiketerile eka
mapfhumba lawa.