Vaaki Va Xungeta Migingiriko ya TUT eGiyani

Hi Themba Chauke

Holobyenkulu wa xifundzhankulu xa Limpopo Dokodela Phophi Ramathuba u kumile swivilelo kusuka eka va Tshwane University of Technology (TUT) mayelana na ku hlwerisiwa ka migingiriko yo antswisa khale ka kholichi ya Giyani leyi se yi nga rhavi ra TUT eGiyani.

TUT yi vula leswaku ku ya hi makungu ya vona, antswiso lowu wu kunguhatiweke a wu fanele ku fika emakumu hi n’hweti ya Ndzhati lembe roleri, leswaku yi ta Kota ku sungula ku tirha hi ku hetiseka hi n’hweti ya Sunguti 2026.

Leswi swi va kona endzhaku ka loko ku vile na ku kavanyetiwa ka migingiriko yo hlaya ya ku tivisa ka vaaki hi tithendara leti ti nga kona hi van’wana vaaki.

Ku vuriwa leswaku maendlelo lawa ya na xiave xo biha eka matshalatshala ya Yunivhesithi ku heta migingiriko ya antswiso hi nkarhi lowu vekiweke. Leswi swi ta tlhela swi veka ku pfuriwa ka Yunivhesithi leyi lembe leritaka eka nxungeto, naswona vaaki va le Giyani na tindhawu ta Mopani hi ku angarhela va ta khumbheka eka mhaka leyi tanihileswi Yunivhesithi yi nga ta pfuna swinene eka timhaka ta tidyondzo ta le henhla exifundzenintsongo.

“A hi nge pfumeleli ntlawa wa vanhu va ntsongo ku kavanyeta migingiriko leyi endleriweke ku tisa nhluvukiso eka vaaki. Kuhava munhu loyi a nga le henhla ka nawu naswona mhaka leyi hi yi mangarile eka voko ra nawu ku tirha ntirho wa vona ehenhla ka lava va xungetaka nhluvukiso lowu faneleke ku vuyerisa vaaki hi ku angarhela” ku vula Holobyenkulu dkt Ramathuba.

Holobyenkulu u tlherile a kombela varhangeri va vaaki na swiyenge swa vaaki ku seketela phurojeke leyi na ku tiyisisa leswaku phurojeke ya humelela ehandle ka swirhalanganyi.

Kasi enkarhini lowutaka, ku vuriwa leswaku vukona bya maphorisa byi ta va kona ku tiyisisa leswaku migingiriko ya ku tivisa tithendara a yi kavanyetiwi

Ku ta tlhela ku va na vurindzi lebyi lavekaka hi ku tirhisana na TUT xikan’we na Xiyenge xa nawu xa le ndhawini leyi.