Opinion | Xana hi Xupula Floyd Shivambu Ntsena Hikuva a Endzele Bushiri?

Floyd Shivambu, Matsalaninkulu wa vandla ra MK Party, u endzele kereke ya Muprofeta Shepherd Bushiri eMalawi hi nkarhi wa Paseka. Endlelo leri ri vange hoyi-hoyu leyi kulu laha tikweni, leswinga endla leswaku Ndzawulo ya Vuavanyisi yi humese xitatimende yi tshikelela mhaka ya leswaku Shivambu u ntsanwile nawu wa tiko hikuva  a endzerile Bushiri.

Murhangeri wa kereke ya Enlightened Christian Gathering Bushiri u henhliwa hi milandzu yo hlaya laha tikweni ra Afrika-dzonga ku katsa nandzu wa ku baleka laha tikweni endzhaka ka swihehlo swo pfinya, ku hlatshwa Mali na milandzu yin’wanyana.

Vandla ra MK Party na rona rivile ri humesa xitatimende ri fambela ekule na Shivambu, laha ringa vula leswaku Shivambu u endzerile Bushiri, kuri ku rhandza ka yena, ku nga ri ka vandla.

Hi ku ya hi mina, Vandla ra MK ingi ri lo swi kombisa ntsena leswaku Floyd u yile eMalawi hi rendzo ra yena n’winyi kambe MK a yi na xiave eka rendzo leri swi helela kwalaho, ri nga yi emahlweni na ku tlhokovetsela na ku kombisa leswaku a ri lavi swirho swa vandla swi va na Vuxaka na Bushiri.

Mhaka ya Shivambu yi pfuxile swivutiso swotala swo tanihi: Hinkokwalaho ka yini mfumo wu ti komba u ri na xihlawulambala? Loko swirho swa DA na PA va endzela Israyele – tiko leri Afrika Dzongo ringa ri yisa ekhoto ya misava hi mayelana na ku dlayiwa ka vanhu ePalestine, a hi twangi xitatimende kusuka eka mfumo, Kambe loko ku ri Floyd, mfumo wu humesile xitatimende.

Naswona mhaka leyivavaka hileswaku DA na PA, na wona mavandla lawa i swirho swa mfumo kambe Floyd, yena a hi xirho xa mfumo naswona a hi xirho xa palamende.

A ndzi vuli leswaku Shivambu u endlile leswinene hikuva ndza pfumela leswaku Bushiri u fanele a langutana na nawu eka swihehlo swa yena. Kambe munhu un’wana na un’wana u na lunghelo ra ku hlangana na lava a rhandzaka ku va na vona, hambi ku ri ku nghena kereke leyi a yi lavaka.

Hi fanele hi khoma vanhu hinkwavo hi nawu wun’we. A hi fanelanga hi tirhisa nawu ku xupula lava hi nga va rhandziki hi vutlhari bya vona.

Ndzi yimela ntiyiso, ku nga riki ku hlawula mhaka.