Vutsari Bya Nhlulo Byiya emahlweni Hi Matimba
Nhlulo Mtileni i mutsari wa tibuku wa Makume Mbirhi wa malembe hi vukhale loyi a nga velekiwa emugangeni wa ka Nkuri eka Tomu. Nhlulo u tsala tibuku hi ririmi ra Xitsonga na Xinghezi, naswona u sungurile ku tsala tibuku a ri na Khume Nharhu wa malembe hi lembe ra 2018.
Ntikelo wa vutsari bya yena wu sungurile ku vonakala hi lembe ra 2019, laha Nhlulo a nga kandziyisa matsalwa ya Nharhu ya switlhokovetselo ya Mbirhi hi ririmi ra Xitsonga na rin’we hi ririmi ra Xinghezi, a ya emahlweni a tsala na tsalwa ra vutomi.
Mavito ya tibuku leti a nga ti tsala i ‘NWINYI WA NKOSI; VURILAXINTSENGELE; RILA MOYA WANGA; xikan’we na na WHEN THE GAME IS OVER WE SHALL RETURN HOME, laha a kombisaka leswaku tin’wana ta tibuku ta nhlengelo leti a nga hoxa xandla eka tona i HI LANDZA NHLALALA, N’WA -MALINI na I WISH I’D SAID VOL 7.
Eka tibuku leti, buku leyi yi tivekaka hi vito ra N’WA MALINI hi yin’wana leyi yi nga va na nkateko wo tekiwa hi va Ndzawulo ya Dyondzo eka xifundzankulu xa Gauteng.
‘’Tanihi mutsari leswi swi ndzi hlohlotelaka leswaku ndzi tsala tibuku ndzi ya emahlweni, ndzi lava ku dzenengela nzhaka ya ririmi ra manana leswaku ri nga tsan’wiwi. Xin’wana lexi xi ndzi nyikaka matimba i mhaka ya leswaku munhu loyi a ndzi hlohlotelaka ku tsala u pfapfarhutile matsalwa yo hlaya, namina ndzi lava ku fika laha a nga fika kona kumbe ku hundza kona.’’ Nhlulo wa hlamusela.
Lembe leri nga hundza ra 2024, buku ya N’WINYI WA NKOSI yi xiximiwile hi sagwadi ku suka eka va African Honeree Authors na va Xitsonga Literacy Awards. Hikokwalaho ka sweswo, Nhlulo u tshembha leswaku buku leyi hi yona yi nga n’wi yisa emaninginingini.
Nhlulo u hlamusela leswaku eka malembe lawa ya taka u lava ku tivona a ri un’wana wa lava va nga ta hlayiwa eka vanhu lava va hlovisaka vutsenga bya ririmi ra Xitsonga. ‘’Ndzi tivona ndzi pfapfarhutile tsalwa leri nga ta vulavula hi tiphuphu ta vutsari bya Xitsonga,’’ wa engetela, a ya emahlweni a hlohlotela vana la va nga na nyiko yo fana na ya yena, a va kombisa leswaku swa koteka kuva munhu a humelerisa milorho ya yena , “mhakankulu i ku ti nyiketela eka swilo hinkwaswo leswi munhu a swi endlaka,” Wa Gimeta.
