Vantshwa va Simeka Nhlangano wo Pfuna Vadyondzi

Hi Mkateko Ndlovu.

Eka swilo hinkwaswo dyondzo i xitlhangu, leswi hi swona leswi swi nga hlanganisa vantshwa va Mune ku tumbuluxa nhlangano lowu wu nga ta hoxa xandla eka ku ndlandlamuxa timhaka ta dyondzo. Vantshwa lava kusuka emugangeni wa ka Nkuri eka Tomu, ehandlenyana ka doroba Giyani va tumbuluxile nhlangano lowu wu vitaniwaka Nhlalala Educational Foundation lowu va vulaka leswaku i nhlangano lowu seketelaka dyondzo tanihi vaaki va Afrika-Dzonga lava va vonaka swi ri na nkoka ku pfuna mfumo hi ku seketela dyondzo.

Nhlalala Educational Foundation i nhlangano lowu pfunetaka dyondzo hi ku nyikela machudeni switirhisiwa swa dyondzo swo hambana-hambana. Nhlangano lowu wu simekiwile hi lembe ra 2025 hi Sunguti hi xikongomelo xo seketela dyondzo ni vana lava humaka eka mindyangu leyi sweleke.

Nhlangano lowu wu simekiwile hi Nhlulo Mtileni, Hlungwani Sydney, Paulinah Mabasa na Mashaba khensa Alilcia. lava i vantshwa lava tivaka nkoka wa dyondzo kutani va vonile swin’wana swi kayivela kutani va sungula ku teka magoza yo nyika nseketelo wa nsusumeto eka vadyondzi, ku anamisa miehleketo na ku hlohlotela ku humelela eka tidyondzo hi ku nyikela masagwadi eka machudeni lawa ya tirhaka kahle eswikolweni xikan’we no nyikela switirhisiwa eka vadyondzi.

Nhlangano lowu wu tiyisisa leswaku vana va kuma dyondzo leyi fanaka ni ku ringana. Eka lembe leri va kotile ku nyikela masagwadi eka xikolo xa le henhla xa John Mbhendle etindhawini ta ka Xihosana ehansi ka doroba ra ka Malamulele. Kasi hi hala tlhelo, Nhlalala Educational Foundation yi pfuna vadyondzi va ka ntangha Khume ku va endlela swikombelo swo amukeriwa etiyunivhesithi. Phephahungu ra Nthavela ri tihlanganisile ni va Nhlalala Educational Foundation ku kuma matirhelo ya vona na mitlhotlho leyi va hlanganaka na yona. Va kombisile leswaku swin’wana swa mitlhotlho leyi va hlanganaka na yona i ku pfumaleka ka

macheleni leswi ku nga xiphiqho xikulu ku kota ku fambisa nhlangano. Va tlherile va kombisa leswaku va swi tsakela ku nyikela hi lakukulu, kambe ntshikelelo wa macheleni wa va pimela. Va kombisa leswaku malembe lawa ya taka va navela ku antswisa dyondzo hi ndlela ya xiyimo xa le henhla. Lava va nga na ku navela ku pfuna vantshwa lava eka rendzo leri va nga tihlanganisa na vona eka 073 564 5999 kumbe 079 658 6744 na imeyili ya mosesekhaizen@gmail.com