Vukhamba no Chavisela swi Lemukiwa eMthatha

Hi Themba Chauke

Holobye wa maphorisa ya tiko, Senzo Mchunu, u sola swinene nxungeto na ku chaviseriwa ka nhlangano wo pfuna vaaki wa Gift of the Givers, hi nkarhi lowu a wu ri ku nyikeni ka mpfuno eka vaaki lava va hlaseriweke hi ndhambhi etindhawini ta Mthatha exifundzheninkulu xa Kapa Vuxa.

Ku hehliwa leswaku ku na ntlawa lowu vitaniwaka ‘timafiya ta mati’ lowu hlanganisiwaka na vaphakeri va vukorhokeri lava nyikiweke tikontiraka to phakela mati hi Masipala wa Xifundzhantsongo xa OR Tambo, lava va nga chavisela vatirhi va Gift of the Givers, hi nkarhi lowu va Gift of the Givers a va phakela mati yo tenga yo nwa eka vaaki lava khumbhekeke eka ndhambhi leyi ya ha ku humelelaka etindhawini letiya.

Holobye Mchunu a ri eMthatha hi mahelo ya vhiki ku ya burisana xikan’we na ku khensa swirho swa maphorisa ya tiko eka matshalatshala yo pfuna hi nkarhi wa ndhambhi ku fika sweswi. Ndhambi leyi, yi vuriwa kuva yi koxile vutomi bya vanhu va 90, xikan’we na ku siya madzana-dzana va ri hava makaya. Hi nkarhi wa rendzo rakwe ra le Mthatha, Holobye u kotile na ku burisana na mindyangu leyi yi khumbekeke.

Loko a burisana na vateki va mahungu hi ku sola mhangu leyi, Holobye Mchunu u vurile leswaku maphorisa a ma nge pfumeleli maendlelo yo chavisela xikan’we na ku sivela lava va nga le ku tirheni hi ku tinyiketela ku ponisa vutomi na ku tisa mpfuno eka vaaki.

“Gift of the Givers, i khale yi pfuna vaakatiko va Afrika-Dzonga, naswona ku hlaseriwa ka vona eka maendlelo ya vona ya vumunhu a swi amukeleki. Kuhava munhu kumbe ntlawa lowu wu nga ta pfumeleriwa ku endla mali hi makhombo xikan’we na ku xungeta vuhlayiseki bya vanhu,” ku vula Mchunu, loyi a nga ya emahlweni a vula leswaku maphorisa ya ta endla ntirho wa vona ehenhla ka swihehlo leswi.

“Maphorisa ya ta tiyisisa vuhlayiseki bya mihlangano yo pfuna vaaki endhawini liya, naswona lava va xungetaka mihlangano leyi va ta vonana na voko ra nawu.” U ya emahwleni. Maphorisa ya vula leswaku ya tlhomile tihlo na le ka vanhu lava ku vuriwaka leswaku va nghenela mimiti leyi yi weriweke hi khombo ku ya yiva tanihileswi mindyangu leyi yi nyikeriweke. Holobye u tiyisisile leswaku vurindzi bya maphorisa byi le henhla eka mhaka leyi. “Leswi swi katsa na mimiti ya vafi, hi ta vona leswaku tinhundzu ta vona ta hlayiseka,” Mchunu wa gimeta.