MPHENI YI HOXA GOZA EKA KU TLAKUSIWA

Hi Themba Chauke

Mpheni Home Defenders yi tekile goza ro ya eka xiyenge lexi landzelaka eka mitlangu yo tlakusiwa kusuka eka Ligi ya ABC Motsepe hi ku hlula xipano xa Ngwaabe City Motors 1-0 xo huma exifundzenintsongo xa Sekhukhune, eka ntlangu lowu a wu tika swinene hi Mugqivela. Ntlangu lowu swipano haswimbirhi a swi tlanga hi matimba leswaku swi ta kota ku tlakusiwa, kambe Mpheni Home Defenders yi kotile ku hlula eka ntlangu lowu hi xikoro xi ri xin’we, lexi hambanyiseke swipano leswimbirhi ku kondza ntlangu wu fika emakumu.

Ehandle ka matshalatshala yo tiyimisela kusuka eka Ngwaabe City Motors ku ringeta ku kuma xikoro xo ringanisa hi nkarhi wa ntlangu, Mpheni Home Defenders a yi tikhomile kahle endzhaku laha va koteke ku sirhelela hi ku hetiseka eka xikoro xa vona ku kondza ntlangu wu fika emakumu.

Ku hlula ka Mpheni Home Defenders swi vula leswaku va ya emahlweni eka mitlangu leyi landzelaka ya ku tlakusiwa kusuka eka Ligi ya ABC Motsepe, loko Ngwaabe City Motors ya ha ta va eka ligi ya ABC Motsepe. Mpheni yi ta ya yimela xifundzakulu laha swipano swa nkaye kusuka eka swifundzakulu hinkwaswo swi nga ta phikizanela xiyimo xin’we xo ya tlanga eka National First Division (NFD) leyi sweswi yi tivekaka tanihi Motsepe Foundation Championship.

Tanihileswi ku nga xipano xin’we ntsena lexi tlakusiwaka kusuka eka Ligi ya ABC Motsepe ku ya eka Motsepe Foundation Championship, ku vuriwa leswaku Ligi ya ABC Motsepe hi yona yo tika swinene eka ntlangu wa bolo ya milenge laha tikweni.

Xipano xa Mpheni Home Defenders, xi tlangile mitlangu yo lava ku tlakusiwa ku ya eka Motsepe Championship ku ringana ka ntlhanu ehandle ka lembe leri hundzeke, leswi swi xi vekaka eka xiyimo xa kahle xa ntokoto wa mitlangu yo lava ku tlakusiwa. Leswi endlaka leswaku swipano swi lwela ku tlakusiwa ku ya eka Motsepe Foundation Championship hileswaku swipano swi kuma mali ya mpfuno ya n’hweti na n’hweti leswi endlaka leswaku va kota ku hakela vatlangi na vadzaberi leswaku va langutana swinene na ntlangu wa bolo ya milenge ku nga ri ku lava tindlela tin’wana to tihanyisa hi hala tlhelo.