Muyimbeleri wa Xitsonga a Simeka Vandla ra Tipolitiki
KA GAZA – Muyimbeleri wa ndhuma wa Xitsonga Benny “The President” Mayengani u tivise ku simekiwa ka vandla ra yena lerintshwa ra tipolitiki, Action Alliance Development Party (AADP).
Mayengani, khale ka mukhanselara eka vandla Economic Freedom Fighters (EFF), sweswi u lava ku simeka pulatifomo ya nhluvukiso wa vaaki na ku nyika matimba eka xifundzankulu lexi.
Manifesto ya AADP yi kandziyisa xilaveko xa mfikelelo lowukulu eka dyondzo, nhlayiso wa rihanyo, na swivandlanene swa mintirho eka vaaki hinkwavo va tiko ra Afrika-dzonga.
Mayengani u boxile leswaku vandla ra yena ri tiyimiserile ku lulamisa mintlhontlho leyi tiko ri langutaneke na yona, ku katsa na vusweti, ku pfumaleka ka mintirho, na vugevenga.
Murhangeri wa Vandla Mayengani u vile na ndhuma eka vuyimbeleri bya Xitsonga ku ringana malembe yo tala, naswona xiboho xa yena xo nghena eka tipolitiki a xi hlangane helo na ku yimbelela ka yena.
“Ku simekiwa ka vandla leri swinge vangi xungeto ka ntirho wa mina wa vuyimbeleri, ndzi ta ya emahlweni ndzi humesa ti alimbamu, no tsakisak vaseketeri va mina,” ku vula Benny Mayengani eka xitetimete le xinga humesiwa hi vandla ra AADP.
Loko a ya emahlweni, u tshembisile leswaku a nge tirhisi pulatifomo ya yena ya vuyimbeleri ku konka vanhu leswaku va va xirho xa vandla rakwe.
Ku simekiwa ka vandla leri ra AADP ku ta hi nkarhi lowu vaaki vaAfrika-Dzonga vo tala va heleriweke hi ntshembo hi mavandla lamakulu ya tipolitiki.
“AADP yi ta simekiwa ximfumo hi Mugqivela (05 August 2023) eHodela ya Xilumani, Giyani, naswona hi ta tivisa makungu hinkwawo ya vandla ku tirhela rixaka ra Afrika-Dzonga, ku katsa na tipholisi na swirho swa NEC, xikanwe na varhangeri va swifundzankulu,” ku vula Mayengani.
