Ndyangu Wu Sala Wu Nga Ri Na Kaya Hi Ndzilo Lowu Vangiweke Hi Load Shedding
Ndzilo lowukulu wu siye Khuthadzo Mbedzi wa malembe ya makume mbirhi ntlhanu na vana va yena va nga ri na kaya emugangeni wa Tshaulu Tshitumbe, lowu kumekaka ehandlenyana ka Thohoyandou.
Ndzilo wu onhe yindlu ya yena na hinkwaswo leswi a swi ri endzeni ka yona, wu siya ndyangu wu nga ri na ndhawu yo vitana kaya.
Xivangelo xa ndzilo xi ehleketeleriwa ku va ku onhaka ka bokisi ra gezi, leswi vangiwaka hi ku tirhisa gezi hi ku siyerisana “Load Shedding”.
Ku tirhisa Gezi hi ku siyerisana i xiendlakalo lexi tolovelekeke eAfrika-Dzonga, laha mphakelo wa gezi wu talaka ku kavanyetiwa ku sivela “power grid” ku wa.
Hambiswiritano, Phumudzo Mukhwathi, mutshamaxitulu wa nhlangano wa vaaki lowu vuriwaka People’s Liberation, u kombisa, leswaku phakelo wa Gezi hi ku siyerisana wu khumba swisiwana hi ndlela yo vava.
“Loko vanhu vo fana na Khuthadzo va lahlekeriwa hi makaya na nhundzu ya vona hikwalaho ka timhangu leti fambelanaka na load shredding, va sala va ri ekhombyeni naswona va nga ri na ndlela yo pfuxeta leswi va lahlekeriweke hi swona,” ku vula Phumudzo Mukhwathi.
“Xiyimo xa Khuthadzo xa vava. Vanhu vo tala eAfrika-Dzonga va tikarhatela ku tihanyisa naswona va hanya evuswetini,” Mukhwathi u engeterile.
Ku yimisiwa ka gezi nkarhi na nkarhi swi endla leswaku swi vanga tshikelelo eka vanhu loko swita ka ku hlayisa makaya na mabindzu ya vona.leswi engetelaka eka swiyimo leswi se swi nga ehenhla laha tikweni ku fana na ku pfumaleka ka mintirho xikanwe na vusweti.
