Khale ka ‘Miss SA’ a yimela Vatsonga eka vunyanyuri bya mintlangu

Hi Chauke Ntsakisi

Vatsonga va voniwa tanihi rixaka leri nga tekeriwiki enhlokweni loko swita eka vuhungasi na vunyanyuri loko va pimanisiwa na tinxaka tin’wana. Switi komba nhlangano wa vuhaxi wa afrika dzonga (SABC) wu hi tsan’wile loko swita emhakeni ya vunyanyuri. Leswi tanihileswi ntlangu wa Giyani Land of Blood lowu nga ntlangu wo sungula swinene wa Xitsonga lowu endliweke ku sukela loko ku fike thelevhixini eAfrika Dzonga wu nga ha tlangiki eka Mavonakule.

Hambiswiritano, vanhu vambirhi kumbe vanharhu ha karhi ha va vona eka swiyenge swin’wana swa vunyanyuri. Sweswinyana, Ndavi Nokeri loyi a humaka eswitarateni leswi nga na ritshuri swa le Tzaneen exifundzheninkulu xa Limpopo u kume xiave eka ntlangu lowu taka lowu nga ta tlanga eka Mzansi Magic.

Nukeri I n’wambhuri loyi anga kuma xidlodlo xa ‘Miss SA’ hi lembe ra 2022. Hambi leswi vanhu va kombiseke matitwelo yo hambana eka swiyenge swa mabulo laha van’wana va vilerisiwaka hi kuva a pfumala ntokoto eka mintlangu, leswi i xiendlakalo lexikulu xa nkoka lexi kombisaka ku humelela.

Xivono xa van’wana va swirho swa vatlangi va nongonoko wa matimu xi nyikiwile hi Mzansi Magic, tanihileswi ku tekiwa ka kandziyiso wa nongonoko wa ntlangu [drama] ya Hosikati [Queen] Modjadji ku sunguleke.

Ku vuriwa leswaku xitori lexikulu lexi hlamarisaka xi hlohloteriwile hi Hosikati Modjadji wosungula, loyi ku tshembiwaka leswaku u na matimba yo hlawuleka, kukatsa na vuswikoti byo lawula mapapa na mpfula. Kasi rixaka ra yena ri fumile rixaka ra Lobedu eDzongeni wa Afrika kuringana madzana-dzana ya malembe. Leswi hi ku ya hi va ‘Mzansi Magic’.

Xo tsakisa hi ntlangu lowu hi leswaku wuya pfuneta ku tumbuluxa ntshembo wa mintirho eka tiindasitiri ta tifilimi na thelevhixini, laha hi nga taya hi ya vona swikandza swintshwa. Loyi a nga ta tlanga xiphemu xa Hosikati modjadji u ta paluxiwa endzhaku ka nkarhi naswona ntlangu lowu wu languteriwile ku sungula hi n’hweti ya Mawuwani lembe leri.

Sunday World yi vikile leswaku vatlangi va hlawuriwile ku tiyisisa leswaku va kombisa kahle vanhu va matimu lava tlangaka xiave lexikulu eka nongonoko lowu, lowu nga ta hlamuseriwa hi ririmi ra Xikhelobedu. Kasi Shudufhadzo Musida loyi na yena a nga n’wambhuri tlhelo a nga na xidlodlo xa ‘Miss SA’ 2020 na yena u ya va xiphemu xa ntlangu lowu.

Swahatetano, vanhu eka xiyenge xa mabulo xa X lexi khale a xi tiveka tanihi Twitter va karhi va humesa mavonelo ya vona mayelana na ku va Nokeri na Musida va ri xiphemu xa ntlangu lowu.

Laha @God’s Brat! a nga tsala leswaku “vanhu va fanele ku zama ku tshemba Ndavi na Shudu hikuva a ku na munhu a nga velekiwa ari mutlangi naswona munhu un’wana na un’wana u sungula kun’wana.” Loko @NissyPrada, a tsarile leswaku “vana lava yaka exikolweni hikwalaho ka leswi…xana va tshama va kuma xiphemu??? Ku humelela yini hi vona???”