Inki yi khuluka engatini
Hi Ntsakisi Gracia Chauke
Muhaxi wa ndhuma eka rixaka ra Vatsonga loyi a haxaka mahungu eka xitichi xa Munghana Lonene FM, Hlulani Phanuel Magayisa u tlhela a va mutsari wa buku loyi a davukaka endyangwini lowu vuswikoti byo endla marito hi ndlela yo saseka byi nga dzima timitsu.
Magayisa loyi a humaka emugangeni wa Tiyani ehansi ka masipala wa muganga wa Collins Chabane u kandziyisile buku leyi vitaniwaka Hi Swi Vonisa Sweswi! Hi lembe ra 2022. Talenta yo tsala endyangwini wa ka Magayisa yi hlukile ngopfu laha ku nga na vatsari va mune loko hi katsa na Hlulani Phanuel Magayisa.
TP Magaisa, munhu loyi a xiximiwaka ngopfu eka xivandla xa matsalwa ya Xitsonga, na yena i xirho xa ndyangu lowu naswona nhlengeleto wa yena wa tibuku to tlula 20 ta hlayiwa hi swichudeni eswikolweni swo hambana hambana.
Hi nkarhi wa mbulavurisano wo anama na Nthavela, Magayisa u kombisile leswaku ku va a kotile ku tsala buku u kume nhlohlotelo eka swirho swa ndyangu wa yena leswi naswona swi nga vatsari.
“Hi lembe ra 2022 ndzi kandziyisile buku leyi welaka eka switlhokovetselo laha ndzi nga yi thya vito ra Hi Swi Vonisa Sweswi! Kasi xikongomelo xa vito leri xi ta endzhaku ka loko ndzi ta va ndzi langutile leswi nga ku humeleleni emisaveni, ku nga swo biha, swa kahle, swa vunyanyuri na swin’wana na swin’wana,” ku vula Magayisa.
U yile emahlweni a vula leswaku, “ndzi nga vula ndzi nga ti pfinyingi leswaku hambi ku ri vatsari van’wana na van’wana lava loko ndzi hlaya matsalwa ya vona ya ndzi tsakisa a ndzi hlohloteleka swinene.”
Loko a hlamusela, Magayisa u vule leswaku ku sukela khale na khale a ri munhu loyi a hungasa hi ku tsala tinovhele, switlhokovetselo na swirungulana ku kondza loko a ta tsala buku ya yena yo sungula ya Hi Swi Vonisa Sweswi! Hi 2022.
U engetele a vula leswaku a nga tsaka ngopfu loko buku leyi yo ti kuma yi karhi yi hlayiwa hi vanhu vo tala swinene kwala tikweni. Kasi leswi se a nga swi fikelela hi buku leyi hi leswaku buku leyi yi bumabumeriwile hi ndzawulo ya dyondzo ya masungulo ya xifundzhankulu xa Gauteng leswaku vadyondzi va giredi 11 va nga dyondza hi yona eswikolweni leswi tsakelaka buku leyi.
