Siyanqoba Rally: Ramaphosa a vulavula na vaseketeri va vandla
Hi Ntsakisi Gracia Chauke
Magidi ya vaseketeri va vandla ra African National Congress a va hlengeletanile erivaleni ra mintlangu ra Malamulele, exifundzhenintsongo xa Vhembe hi Mugqivela wa siku ra vu 11 Mudyaxihi 2024 eka nhlengeletano [Rally] ya vandla leri, leyi rhangelaka nhlengeletano [Rally] ya rixaka leyi nga ta teka ndhawu loko ha ha kongoma eka nhlawulo wa mani na mani.
Xitediyamu a xi tele hi vaseketeri lava a va ri karhi va kombisa ntsako. Murhangeri wa tiko Cyril Ramaphosa, u humesile hungu ra yena hi matshalatshala yo hlohlotela vavhoti ku seketela vandla.
Ramaphosa u nghene erivaleni ra mintlangu na vatirhela mfumo van’wana va vandla, xikan’we na holobyenkulu wa xifundzhankulu xa limpopo Chupu Stanley Mathabata.
A ku hunga moya wa ntsako mixo hinkwawo loko vaseketeri va ri karhi va yimbelela no tlakusa mijeko ya ANC na ku ambala swiambalo swa vandla. Ntshungu wu pfurhile loko xiyimbeleri xa ndhavuko wa xitsonga Mr Post a endla ndlela yo ya exitejini.
Nhlengeletano [Rally] ya Siyanqoba i matshalatshala ya ANC yo gangisa tivhoti loko maAfrika-Dzonga ma nga si hoxa maphepha ya wona [ballots]. Vandla ra ANC ri tshemba ku engetela vunyingi bya rona etikweni hinkwaro loko ri ri karhi ri lwela ku khomelela eka vunyingi bya rona exifundzheninkulu xa Limpopo.
Murhangeri wa vandla ra ANC Cyril Ramaphosa, u vule leswaku vandla ra yena ri nghena eka nhlawulo lowu hi ku tiyiseka loku tiyeke na ntshembo. “Hi ya eka nhlawulo lowu hi ku titshemba lokukulu naswona hi ta hlamusela kahle masungulo ya ku tshemba ka hina hi siku ra vu 25 Mudyaxihi loko hi ya eka nhlengeletano [Rally] ya hina ya rixaka ya Siyanqoba,” ku vula Ramaphosa.
“Lembe leri hi tlangela 30 wa malembe ya xidemokirasi na ntshunxeko wa hina, leri i lembe ra nkoka eka hina ku ya eka nhlawulo wa vu 7 wa rixaka na wa swifundzankulu naswona hiya hi yimisele tinhloko ta hina ehenhla hi ri karhi hi tiva leswaku vandla ra ANC hi ku tirhisana na vanhu va hina, hi cincile Afrika-Dzonga.” a engetela.
Hambi leswi va amukeleke mintlhontlho leyi yaka emahlweni, minhlangano leyi nga ehansi ka vandla ra ANC ya SANCO, COSATU, na SACP yi komberile hi ku hiseka nseketelo lowu yaka emahlweni, yi kandziyisa ku tinyiketela ka vandla loku nga heriki ku lulamisa swilaveko swa vaaki.
Loko a kombisa ku tshemba loku nga tsekatsekiki eka ku hlula ka ANC, Ramaphosa u bakanyele etlhelo swiringanyeto mayelana na nhlanganyelo wa mimfumo, a kombela vavhoti ku hoxa maphepha ya vona yo seketela vandla ra ANC hi ti 29 ta Mudyaxihi.
