Nhenha yi siya mfungho 

Ntsakisi Gracia Chauke

Vaakatiko va muganga wa Xitlhelani ehandle nyana ka Malamulele va lahlekeriwile hi xirho xa nkoka swinene ku nga Gezani George Manganyi. Manganyi loyi a ri Hosana ya muganga wa Xitlhelani, ehansi ka vukosi bya Hosi Mavambe u hundzile emisaveni hi siku ra vu 2 Khotavuxika 2024 endzhaku ka mavabyi ya nkarhi wo leha.

Murhangeri wa muganga wa Xitlhelani loyi a tiveka swinene hi vito ra kokwani Xitlhelani u tlangile xiave xa nkoka swinene eka muganga wa Xitlhelani.

Manganyi a ku ri yena ntsena murhangeri wa muganga ehansi ka masipala wa muganga wa Collins Chabane, loyi a nga tshama a nyikiwa xidlodlo xa ku va Hosana leyi a yi seketela dyondzo hi xiyimo xa le henhla swinene.

Hi nkarhi wa ntirho wo tsunduka no tlangela Hosana Xitlhelani, lowu a wu khomeriwile eholweni ya vaaki ya Xitlhelani  hi siku ra vu 5 Khotavuxika 2024, vakhomaxiave hi ku hambana hambana, vo fana na va foramu ya mabindzu, va bolo ya milenge kunga Langutani Blue Birds, foramu ya vantshwa, va huvo leyi fumaka xikolo xa Mahuntsi (SGB) na van’wana vo tala va yimile va veka marito mambirhi manharhu mayelana na Hosana.

Walter Chabalala loyi a nga mutshamaxitulu wa huvo leyi fumaka xikolo exikolweni xa le henhla xa Mahuntsi, u vule leswaku Hosana Xitlhelani hi wun’wana wa vahlohloteri eka ku va muganga wa Xitlhelani wu va na xikolo xa le henhla ku nga Mahuntsi.

“Hi lembe ra 1996, xikolo xi vile xi tumbuluka, kasi loko hi lavisisa matimu hi kume leswaku Hosana Xitlhelani hi wun’wana wa vanhu vo sungula ku ti secha xikhwama leswaku mhaka ya xikolo yi vulavuriwa,” ku vula Chabalala.

Loko a ya emahlweni a hlamusela, Chabalala u vule leswaku Hosana Xitlhelani hi wun’wana wa vanhu lava a va seketela xikolo xa mahuntsi na muganga wa Xitlhelani hi ku angarhela.

“Ku bile nkarhi laha hi nga va na xirilo tani hi tiko loko hi vona onge dyondzo ya mbombomela endzeni ka mugangeni wa hina, Hosana Xitlhelani u tile na xivono xa ku tumbuluxa Xitlhelani Education Trust Fund.

“Ku engetela kwalaho, loko va MTN va n’wi tshinelela no burisana na yena mayelana no hirha ‘aerial’ loko yi simekiwa endhawini liya, Hosana Xitlhelani u hlawurile ku vulavula na swivumbeko swa muganga wa yena mayelana no kongomisa mali eka nhlangano wa Xitlhelani Education Trust Fund, ku ri ndlela yo nyikele leswaku nhlangano lowu wu va na swa le mandleni, tlhelo xikongomelo xo hlohlotela vana leswaku va dyondza ku ya emahlweni,” ku gimeta Chabalala.


Hi ku yimela foramu ya mabindzu, Vaheed Patel loyi a nga n’winyi wa xitolo xa Quicksave u yimile a kombisa vuxaka lebyi a ri na byona na Hosana Xitlhelani.

“Hosana Xitlhelani a ku ri munhu loyi a tala ku ndzi endzele exitolo. Hambiswiritano, se a ku ri nkarhi wo leha nyana ndzi nga ha n’wi voni, kambe eka minkarhi leyi hundzeke, a tala ku burisana na mina hi ndlela leyi hi nga hoxaka xandla ku pfuna no hluvukisa miganga,” ku vula Patel.

Hosana Xitlhelani u bumabumeriwile ku va a vile munhu loyi a rhangela hi ku tinyiketela ku antswisa vutomi bya vaaki.