Ndzi dinga nseketelo, ku vula Fanelo Shibambo

Hi Ntsakisi Gracia Chauke

Fanelo Brian Shibambo loyi a davukaka emugangeni wa Gumbani ehandle nyana ka Malamulele, u kokile rinoko ra vanhu eka swiyenge swa mabulo ngopfu-ngopfu eka Facebook, endzhaku ka loko a kandziyisile ntirho wakwe wa ku dirowa.

Shibambo i jaha leri hanyaka na swiphiqo swa tindleve, leri nga n’wana loyi a nga kurisiwa hi xirho xa ndyangu wakwe endzhaku ka loko vatswari va yena Khanyisa Lucy Shibambo na Thembha Hudson Chabalala va hundzile emisaveni a ha ri lontsongo swinene.

Mavhiki ma nga ri mangani lama nga hundza, Shibambo u dirowile wun’wana wa vanhu va ndhuma eka vunyanyuri bya rixaka ra Vatsonga, ku nga Philani loyi a nga kombisa ku tsakela xifaniso lexi diroweke hi Shibambo. Tlhandlakambirhi, Shibambo u dirowile vanhu vo tala va ndhuma va kwala Afrika Dzonga, ku ri ndlela yo endla matshalatshala yo navetisa ntirho wakwe.

Shibambo u dyondzile xikolo xa le hansi xa Hlawulekani, kutani u yise tidyondzo ta yena emahlweni exikolweni xa le henhla xa Khatisa ku kondza a heta matiriki.

Loko a burisana na phephahungu ra Nthavela, Shibambo u vule leswaku vutshila i nchumu lowu nga embilwini yakwe naswona a wu rhandzaka swinene, ku nga khathariseki mintlhontlho leyi a langutaneke na yona ku nga xiphiqo xa tindleve, laha a twelaka kule naswona hi ndleve yin’we.

“Ndzi tshubule nyiko ya mina ya vutshila byo dirowa loko ndzi ri eka giredi ya 4, exikolweni xa le hansi xa Hlawulekani. Vadyondzisi na vona a va yi vona nyiko ya mina kambe ndzi nga switekeli enhlokweni. A ndzi ri munhu loyi a tshamela ro dirowa tipopayi.

“Ndzi munhu loyi a nga kula a ri na xiphiqo xa tindleve endzhaku ka loko ndzi hlangane na khombo, hambi leswi ndzi nga swi tiviki leswaku a ku ri khombo ra yini hikuva a ndza ha ri lontsongo, kambe sweswo a swi ndzi sivelanga ku dyondza xikolo ku kondza ndzi fika la ndzi nga fika kona,” ku hlamusela Shibambo.

Shibambo u yile emahlweni a vula leswaku u tiyimisele ku tirha hi matimba ku kondza a fika eka xiteji xo va mutshila wa ndhuma. “Ndzi tiyimisele ku va xikombiso eka vanhu vo dirowa lava ha taka vo fana na mina. Riendzo ra mina tanihi mutshila loyi a nga riki na switirhisiwa swo enela, ndzi navela ku hlohlotela van’wana hi ntirho wa mina loko ndzi ri karhi ndzi tshemba ku kuma nseketelo [sponsorship] lowu nga ta ndzi pfumelela ku ya emahlweni ndzi antswisa vutshila bya mina,” ku vula yena.

Shibambo u tinyungubyisa hi nyiko ya yena ya vutshila naswona u kombela munhu wun’wana na wun’wana ku n’wi seketela tanihi leswi tiko ra Afrika Dzonga ri nga khinsama hi matsolo loko swi ta eka ku pfumaleka ka mintirho.

U tlhele a vula leswaku leswi endleka leswaku ntirho wakwe wa ku dirowa wu koka rinoko, i timhaka ta ku ya emahlweni no antswisa xikili xa yena. “Vutomi bya masiku lawa loko byi pimanisiwa na bya khale, byi olovile swinene. Manguva lawa, ku na tipulatifomo ta vuhlanganisi na vunyanyuri hi ku hambana hambana, laha munhu a kotaka ku dyondza no antswisa xikili xa yena hi ku languta minkandziyiso ya van’wana vanhu,” a gimeta.